Salmos 86 - Biblia ande chib RomaniSamo tu san o Del O molipe katar o David. 1 Devla, asun man, soke sem but tristome ta chorro. 2 Arak man soke sem chuke chacho, tu san mo Del, ¡braduisar che sluga kai uzdilpe ande tu! 3 Devla, te avel chuke zalba mandar, soke chuke moliv man suako llive. 4 Devla, veselisar gale sluga chiro, soke chuke moliv man. 5 Soke tu Devla san lacho ta prosti, tu voli but golen kai molinpe chuke. 6 Devla, asun mo molipe, ¡thov sama kai mangav tutar! 7 Ande mi nuzda ikhardem tut, soke tu de anglal. 8 ¡Inai ni iek del sargo tu, Devla! ¡Inai niso sargo e ezgode kai cherdan! 9 ¡Ioi Devla! tu cherdan sa e phuvia, ta von ka aven tute te blagosin tut ta te blagosin cho anav. 10 Soke samo tu san o Del, ¡tu san baro, ta chere glamne ezgode! 11 ¡Ioi Devla! sikav mange cho drom, te phirav ande cho chachipe. Cher te avel ande mo lio o liubao katar cho anav. 12 Mo Gazda ta mo Del, ka blagosiv tut sa me liea ta ka blagosiv cho anav suako llive. 13 ¡Soke baro si cho volipe pala ma! ¡Braduisardan man te na perav ando limori! 14 ¡Ioi Devla! llene barikane ta silne, kai ni thoven chuke sama, vazdinaile pe mande ta mangen te mundaren man. 15 A tu Devla, san iek Del kai voli ta si chuke zalba, kai terpi ta san pherdo volipe ta chachipe. 16 Dik pe mande, ¡te avel chuke zalba mandar! ¡Braduisar che sluga! ¡De le chi zor! 17 Cher te dikhav kai san lacho manchar, te dikhen gola kai murzin pe mande ta te achen ando lallao. ¡Soke tu Devla, pomozi man ta de man zor! |
Biblia ande chib Romani © Sociedad Bíblica Chilena, 2018.
Chilean Bible Society