Salmos 85 - Biblia ande chib Romani

¡Braduisar amen pale!

Katar o lleno kai sikavel te llilaben. Llili e chavenge katar o Kore.

¹ Devla, tu avilan lacho gale foroia kai si chiro, cherdan te irilpe o Jakob katar po phandipe.

² Prostisardan o bilachipe katar cho foro ta sa e ezgode bilache kai cherde,

³ achadan sa chi joli, ta durilan katar cho silnope.

⁴ Devla, tu san amaro braduimari, ¡braduisar amen i akana ta phag e joli kai si chuke pe amende!

⁵ ¿A so, ka ave joliariko ostade pe amende? ¿Chi joli ka avel pe viche iek pala aver?

⁶ ¿Ni ka de amen zivoto pale te sai veselilpe cho foro cheres tu?

⁷ ¡Ioi Devla! ¡Sikav amenge cho volipe, ta braduisar amen!

⁸ Ka asunav so ka phenel o Del o Gazda, soke ka del orba katar e pas pe foroke, golenge kai si chache lea, te na cheren pale o dilipe.

⁹ Chachimaia, o Del si but pase, te braduil golen kai blagosin le, leko baripe ka zivil ande amari phuv.

¹⁰ Maladile o volipe ta o chachipe, e pas ta so si orta chumidiepe,

¹¹ o chachipe ka likel katar e phuv ta so si orta ka dikhel katar o miloso.

¹² Isto o Del ka del amen o lachipe, ta amari phuv ka del petar pe septelie.

¹³ O chachipe ka llal angla le, ta ka lacharel leke o drom.