Salmos 81 - Biblia ande chib Romani

O postenipe e Devleko ta o bilachipe katar o Israel

E lleneke kai sikavel te llilaben. Ando salterio katar o Gat, e Asafeke.

¹ ¡Llilaben veselimaia e Devleke kai si amari zor! ¡Urkin veselimaia ta blagosin e Devle katar o Jakob!

² Llilaben llilia prema o pandero, basalen e gugli arpa ta e sitara.

³ Basalen e tuturuga kana likel o nevo chon, ta i kana likel e mesechina, kai si o llive katar amari mai bari slava.

⁴ Soke gava si o zakono kai o Del katar o Jakob dia e Israele,

⁵ gua si o zakono kai si sa dino e Joseeke, kana vou likisto katar o Ejipto. Asundem iek chib kai ni pinllarava:

⁶ Liem o pharipe katar che zea, liem tutar o rado pharo.

⁷ Ande chi nuzda ikhardan man, ta me braduisardem tut, diem tuia orba katar o oblako kai girmila, zumadem tut pasa o pai katar o Meriba.

⁸ Tu san mo foro, asun so ka phenav chuke: ¡Daboida te kande man, Israel!

⁹ Na muk te aven tut dela katar aver phuvia, na de changa angla e dela kai ni pinllare.

¹⁰ Me sem o Gazda, cho Del, gua kai ikanda tut katar o Ejipto. Putar cho mui ta me ka dav tut te ja.

¹¹ A mo foro ni kamla te asunel mo avazi, ¡o Israel ni kamla man!

¹² Goleke muklem te cheren pe piro, ta zivisarde sar saia lenge drago.

¹³ ¡Te asundaia man mo foro! ¡Te lleloia o Israel pe me droma,

¹⁴ but oma me peradema lenge dusmanonen ta vazdiema mo va pe gola kai marenpe lenchar!

¹⁵ Gola kai murzin po Del sai peleatar daratar, ta achilea proketime ostade.

¹⁶ O Del sai diaia pe foro te jal o mai lacho lliu, ta sai diaia len o mai lacho aullin katar e pechina te pravarel len.