Salmos 80 - Biblia ande chib Romani

¡Dik pe amende lachimaia!

Katar o lleno kai sikavel te llilaben prema e llili katar e lulunlla. Orba chachi ta llili katar o Asaf.

¹ Chobano katar o Israel asun, tu kai inllare e Josee sargo iek stoka bakrengi, kai cho trono si maskar e kerubinura, ¡sikado!

² ¡Sikav chi zor angla o Efrain, angla o Benjamin ta angla o Manases! ¡Ta aide te bradui amen!

³ ¡Ioi Devla! Cher te ava sar sama omanglal, ¡Dik pe amende ta ka ava braduime!

⁴ Gazda, Devla, kai si tut sa e zor, ¿gachin ios ka ave joliariko po molipe che foroko?

⁵ Cherdan te ja amare ausa sargo marrno, pilam amare ausa sargo o pai.

⁶ Cherdan te maren amendar espurnia e llene kai zivin truial amendar, ta amare dusmanura asan peke amendar.

⁷ ¡Ioi Devla kai si tut sa e zor! Cher te ava sar sama omanglal, ¡Dik pe amende ta ka ava braduime!

⁸ Katar o Ejipto andan iek drak, tradian e phuvien ta thodan la ande phuv.

⁹ Chistosardan lake e phuv, ta e drak cherda zile ta pherda sa e phuv.

¹⁰ Ucharda e burdura pe senkaia, ta lake krangura ucharde e kasta katar e sedrura e Devleke.

¹¹ Lake krangura resle llik kai e mora, ta llik kai o pai o Eufrates barile lake drakhorra.

¹² ¿Soke peradan laki bar ta muklan te ikanen peke e drakha sa e llene kai nakhen katar o drom?

¹³ ¡E bale dive zatrin la! ta e zivirinie katar o vos jan la.

¹⁴ Devla, kai si tut sa e zor, irisao, me moliv man chuke, dik pe amende katar o miloso ta thov sama ta aide kai gaia drak,

¹⁵ katar e drak kai isto tu thodan ande phuv, katar e drakhorra kai tu dian len zor.

¹⁶ Zatrisar jolinaia golen kai chinde la ta phabarde la,

¹⁷ a pomozisar e llene kai esvirisardan, gole chaurre e manuseko kai dian le zor chuke.

¹⁸ Ta nikada ios ni ka duriva tutar. ¡De amen zivoto, ta chuke ka moli amen!

¹⁹ ¡Ioi Gazda, Devla kai si tut sa e zor! Cher te ava sar sama omanglal, ¡Dik pe amende ta ka ava braduime!