Salmos 51 - Biblia ande chib Romani

¡Ioi Devla! te avel chuke zalba mandar

Katar o lleno kai sikavel te llilaben. Llili katar o David kana o profeta o Natan dia po David soke cherda o kurvaluko e Betsabeaia.

¹ ¡Ioi Devla! te avel chuke zalba mandar, pala cho volipe, pala e bari zalba kai si tut, kos mi dos.

² ¡Jalav man katar mo bilachipe! ¡Chistosar man katar mo bilachipe!

³ Phenav mo bilachipe, nasti ikanav katar mo mislo o bilachipe kai cherdem.

⁴ Chuke cherdem o bilachipe, samo chuke angla tu cherden o bilachipe, gua so chuke inai drago. Chi orba si chachi, niko ni tromal te del orba kana tu chine chi kris.

⁵ Chachimaia me sem bilacho sar kana biandilem, sem bilacho sar kana sema ande me dako lli.

⁶ Chachimaia tu voli e llenen kai ni kojaven, ta dian man bizaipe andre ande mo lio.

⁷ Chistosar man e patrorrenchar, ta ka achav chisto, jalav man ta ka achav mai parrno neko o iv.

⁸ Pher man dragostia ta veselia, veselisar man pale, ta ka saston e kokala kai dukhadan.

⁹ Duriar katar che akha mo bilachipe ta kos sa o bilachipe kai cherdem.

¹⁰ ¡Ioi Devla! ¡thov ande mi esnaga iek lio chisto! ¡De man iek duo nevo ta chacho!

¹¹ Na duriar man tutar ta na le mandar cho santo duo.

¹² Cher te acharav pale e dragostia katar cho braduipe, istar man ande cho posteno duo,

¹³ te sai sikavav che droma e llenenge kai ni kanden tut ta te irinpe tute e llene bilache.

¹⁴ Na muk te mundarav nika, Devla, Del katar mo braduipe, ta ka phenav ando llilabipe kai tu san chacho.

¹⁵ Devla, mukliar mo avazi, ta ka blagosiv tut ande llilia.

¹⁶ Soke tu ni kame te da kurbanura, kai me sai dav len, a gua inai so si chuke drago.

¹⁷ O kurbano e Devleke si te avel iek duo dukhado, ¡Soke kana si iek lio dukhado ta phago, tu ni trade le!

¹⁸ Cher o lachipe ando Sion, pala cho lachipe, vazde pale e zidura katar o Jerusalem.

¹⁹ Ondaka ka le e kurbanura chache, so si dino kai phabardol sa, ondaka ka denpe guruvorra upral pe cho altar.