Salmos 47 - Biblia ande chib RomaniO Del si o Charo katar sa e phuv Katar o lleno kai sikavel te llilaben. Llilia katar e chave katar o Kore. 1 ¡Maren e vastenchar sa e phuvia! ¡Blagosin e Devle ta urkin veselimaia! 2 Soke katar o Del si te dara, vou si o baro Charo katar sa e phuv. 3 Vou thovel e forura ta e phuvia tala amare porrne te gazdari len. 4 Vou esvirisarda amenge so si te la, kai si o baripe katar o Jakob, kai o Del volisarda le. 5 ¡O Del amaro Gazda likisto pe po trono ta asundol o urkipe veselo ta e tuturuga kai basel! 6 ¡Llilaben, llilaben llilia e Devleke! ¡Llilaben, llilaben llilia amare Charoke! 7 ¡Llilaben ande sukar alava e Devleke, soke vou si o Charo katar sa e phuv! 8 ¡O Del si Charo e phuviengo! ¡O Del besel pe po santo trono! 9 E llene mai glamne katar e phuvia chidiniaon sargo o foro katar o Abraam, 10 soke e zor katar e phuvia si e Devleke. ¡Vou si upral pe sa! |
Biblia ande chib Romani © Sociedad Bíblica Chilena, 2018.
Chilean Bible Society