Salmos 44 - Biblia ande chib Romani

O molipe te sai pomozil o Del

Katar o lleno kai sikavel te llilaben. Sukar alava katar e chave katar o Kore.

¹ ¡Ioi Devla! amare purane phende amenge so cherdan ande gola llivesa, e llivesa e purane.

² Tu, che vastenchar ikandan avere phuvien ta thodan amare puranen.

³ Soke ni dobisarde e phuv ande zor katar lengo jarni, ta ni dobisarde ande zor katar lenge va, Cho va o chacho cherda te dobin, ta o villelo katar cho mui, soke volisardan len.

⁴ Tu Devla san mo Charo, tu cherdan te dobil cho foro.

⁵ Ande cho anav chinosardam amare dusmanonen, ande cho anav ustadam golen kai maraia amen lenchar.

⁶ Soke ni ka uzdiu man ande mo arko, ta ni ande mo jarni,

⁷ soke tu arakhlan amen katar amare dusmanura, ta muklan ando lallao golen kai murzina pe amende.

⁸ Suako llive ka chera baripe ando Del, ta suako llive ka blagosi cho anav.

⁹ A tu chudian amen ta cherdan te avel amenge lallao. Ni lla amare boñikonenchar.

¹⁰ Cherdan te nasa katar e llene kai marenpe amenchar, amare dusmanura choren amen ta inllaren peke sogo mangen.

¹¹ Dian amen lende sargo bakre kai inllaren len te mundardon, ta rispisardan amen maskar e phuvia,

¹² bichindan che foro but eftino, ta ni lian chari pe lende.

¹³ Cherdan te maren amendar espurnia, ta te asan peke amendar e llene kai zivin pasa amende.

¹⁴ Muklan amen ando lallao angla e phuvia, e llene miskon po soro ta maren amendar espurnia.

¹⁵ Sorro llive acharav man ando lallao, ta achardol pe mo mui kai lallav,

¹⁶ pala o avazi me dusmanoko kai mangel te dukhavel man ta kai marel espurnia ta kusel man.

¹⁷ Gala ezgode kai nakha ni avile soke bristardam tut. ¡Ni phaglam e alava kai achilan amenchar!

¹⁸ Ni misli te muka tut ta ni likistam katar che droma.

¹⁹ A tu ustadan amen ande thana kai si e llukela dive, ¡ta uchardan amen ande senka e merimaki!

²⁰ Te bristardama tut Devla, ta te blagosisardama iekhe dele katar aver phuvia,

²¹ tu llanglanale, soke tu pinllare e ezgode mai gurudine katar o lio.

²² A cheres tu, amen sam thode po meripe suako llive, ta sam llinde sargo bakre kai llan te mundardon.

²³ ¿Soke sove Devla? ¡Uste, uste! ¡Na muk amen ostade!

²⁴ ¿Soke gurudo? ¿Soke bristrailan amendar, kai nakha gia bari duk?

²⁵ Inai amen zor ta sam ando lallao, terriamen pe phuv.

²⁶ ¡Uste, aide te pomozi amen ta braduisar amen pala cho baro volipe!