Salmos 42 - Biblia ande chib Romani

Me aduricharav e Devletar

Katar o lleno kai sikavel te llilaben. Sukar alava katar e chave katar o Kore.

¹ Sargo o siervo kai basel kana rodel te piel pai, isto gia trusalo sem tutar, Devla.

² Si mange trus e Devletar, katar o Del o llundo. ¿Kana ka llav te dikhav tut Devla?

³ Sorro llive ta sorro riat me ausa sea mo jape, ta phenen mange sorro llive: ¿Kaitalo cho Del?

⁴ Dav man golli katar gala ezgode, ta rovav andral, dav man golli sar llava e llenenchar, ta inllarava len kai o cher e Devleko ta urkia veselimatar ta daia le fala. ¡Gia bari veselia saia ondaka!

⁵ ¿Soke ka jasarav e zor? ¿Soke ka avav brigime? Ka aduricharav letar, ta ka blagosiv le ios. ¡Vou si mo Del ta mo braduipe!

⁶ Inai man zor. Goleke ka dav man golli tutar katar e phuv katar o Jordan, katar e burdura Jermon ta Mizar.

⁷ Asundol maskar e jar sar girmil o pai kai perel zurale, e bare valura katar cho pai nakhle upral pe mande.

⁸ Ollivesea o Del bichalel mange po volipe, a orachaia ni achel mo llilabipe, vou si o Del katar mo zivoto ta ni ka achav te moliv man leke.

⁹ Me phenav e Devleke kai arakhel man: ¿Soke bristrailan mandar? ¿Soke si te llav ando tangipe pala me dusmanura?

¹⁰ Llik me kokala dukhan man pala e bilache alava katar me dusmanura kai puchen man suako llive: ¿Kaitalo cho Del?

¹¹ ¿Soke ka jasarav e zor? ¿Soke ka avav brigime? Katar o Del me aduricharav, ta ka blagosiv le ios ¡Vou si mo Del ta mo braduipe!