Salmos 40 - Biblia ande chib RomaniDrago mange te cherav so tu mange, murno Del Sal 70 Katar o lleno kai sikavel te llilaben. Llili e Davideki. 1 Sa mi vera thodem ando Del, ta asunda mo roipe, 2 ikanda man katar o bunari e merimako, ni mukla te achav telal katar o glibo. Chapenisarda me porrne upral po barr, zuriarda pe porrne te phirav. 3 Cherda te llilabav iek llili nevi, iek llili kai blagosil amare Devle. But llene kana dikhle gaia ezgoda, kovlilo lengo lio ta thode pi vera ando Del. 4 ¡Blagosime o lleno kai uzdilpe ando Del ta ni llal pala e llene barikane ta kai llan pala o kojaipe. 5 Devla kai san mo Gazda, gachin ezgode glamne cherdan, ta gia lache si che mislura pala amende. ¡Niso inai sargo tu! Voliva te phenav sa gala ezgode, a si mai but neko so sai phenav. 6 Inai chuke drago e kurbanura ni e kuchorra kai si dine, ta ni manglan kurbano ni te den vareso te avel prostipe katar o bilachipe. A tu Devla, putardan me kan. 7 Goleke me phendem: Kate sem, gia sar phenel mandar ando lil katar o zakono. 8 ¡Ioi Devla! drago mange te cherav so tu phene ¡ande cho zakono veseliu man andral andar mo lio! 9 Angla cho baro foro sikadem so si chacho. ¡Tu llane Devla, kai ni phanglem mo mui! 10 Ni achadem mo mui angla cho chachipe, diem orba katar cho chachipe ta katar cho braduipe. Nikada ni gurudem cho volipe ta cho chachipe angla cho baro foro. 11 A tu Devla, ¡na guruv mandar cho volipe! ¡Suako llive te arakhen man cho volipe ta cho chachipe! 12 Soke nakhlem gachin nuzde kai nasti llinav len. Isto mo bilachipe istarda man, ¡i korro achilem! Mai but neko e bal kai si pe mo soro si e ezgode kai nakhlem, ta jasardem i e zor. 13 Devla, me moliv man chuke, ¡Aide te bradui man! Devla, aide oma te pomozi man! 14 ¡Te achen ando baro lallao gola kai mangen te mundaren man! ¡Te nasen lallaimatar gola kai mangen te dukhaven man! 15 ¡Te nasen lallaimatar gola kai maren mandar espurnia! 16 A sa gola kai roden tut te pherdon veselia, sa gola kai zelin te bradui len te phenen: ¡O Del si baro! 17 A me kai sem chorro ta sem brigime, na bristar man Devla. Tu pomozi man ta bradui man, na muk te nakhel but vreme. |
Biblia ande chib Romani © Sociedad Bíblica Chilena, 2018.
Chilean Bible Society