Salmos 25 - Biblia ande chib Romani

Pomozisar amen Devla

Llili katar o David.

¹ Devla, chuke moliv man.

² Murno Del, ande tute uzdiu man, na muk te achav ando lallao. ¡Te na muke te asan peke mandar me dusmanura!

³ ¡Te na achel ando lallao ni iek katar gola kai si len vera ande tute! ¡Te achen ando lallao gola kai pala niso cherdon che dusmanura!

⁴ Devla, sikav mange che droma, sikav mange katar si te phirav,

⁵ illarman man tu. Thou man po drom katar cho chachipe ta sikav man, soke tu san mo Del ta mo braduimari. ¡Sorro llive si man vera ande tute!

⁶ Devla, de tut golli katar o volipe ta e zalba ostade kai si tut pe amende,

⁷ a katar mo bilachipe na de tut golli, katar o bilachipe kai cherdem kana sema terno. Devla, de tut golli mandar, pala cho baro volipe ta pala chi zalba.

⁸ O Del si lacho ta chacho, goleke sikavel o drom e bilachenge

⁹ ta inllarel pe po drom e llenen kai inai barikane, ¡sikavel len ando chachipe!

¹⁰ Suako drom vou cherel e ezgode volimaia ta chachimaia, golenchar kai ni phagen leko alav ta leke zakonura.

¹¹ Devla, baro si mo bilachipe, prostisar man ande cho anav.

¹² O lleno kai blagosil e Devle, o Del ka sikavel leke o drom kai si te esviril.

¹³ Ka del le but blagosipe ta leke porodoke ka avel dini e phuv.

¹⁴ O Del si amal katar e llene kai den le liubao, ta sikavel lenge save si e sovel kai jala.

¹⁵ Suako llive dikhav karing o Del, soke vou ikanel man katar suako dar.

¹⁶ Dik pe mande Devla, te avel chuke zalba mandar, soke sem korkorre ta dukhado.

¹⁷ Suako drom dukhal man mai but mo lio, ikan mandar gaia duk.

¹⁸ Dik pe mi nuzda ta pe mi patnia, ta prostisar sa mo bilachipe.

¹⁹ Dik gachin dusmanura si man kai murzin pe mande silnomaia.

²⁰ ¡Arak man, braduisar mo zivoto! ¡Na muk te achav ando lallao, soke ande tute uzdiu man!

²¹ Ni cherdem o bilachipe ta ni sem dosalo soke mi vera si ande tute.

²² ¡Devla, braduisar e Israele katar sa leke nusde!