Salmos 21 - Biblia ande chib Romani

Llilabel soke dobisarda

Katar o lleno kai sikavel te llilaben. Llili katar o David.

¹ Devla, o charo si veselo soke dian le zor, ¡bari veselia si leke soke cherdan te dobil!

² Cherdan so zelila te cherel, Ni phendan leke kai iok pe so mangla.

³ Lian le bare blagosimaia ta thodan pe leko soro iek korona sunakuni.

⁴ Mangla tutar zivoto ta dian le baro zivoto, zivoto ostade.

⁵ Pala cho pomozipe vou si zuralo, cherdan te avel le liubao ta baripe.

⁶ Blagosisardan le ostade, kana si pasa tu phere le veselia.

⁷ Tu charo, nikada ni ka pere soke si tut vera ando Del, ¡si tut vera ando volipe katar o Del e milosoko!

⁸ Chi zor ka perel pe sa che dusmanura, cho va o chacho ka resel pe gola kai murzin pe tute,

⁹ ka thove len ande iek furnava phabardi kana ka ave te krisi len. O Del ande pi joli, ka phabon ande iag kai zatril.

¹⁰ Ka ikane katar gava sueto ta maskar e llene lenge chaurren ta lengo porodo.

¹¹ I te mangena te cheren chuke o bilachipe ta te denpe orba sar ka cheren le, ni ka cheren pe piro,

¹² soke tu ka chere te nasen ka thove karing lengo mui cho arko.

¹³ ¡Sikav lenge kai san baro, Devla! ¡Veseli amen llilienchar soke dobisardan!