Salmos 19 - Biblia ande chib Romani

O baripe e Devleko dikhol ande so cherda

Katar o lleno kai sikavel te llilaben. Llili e Davideki

¹ O miloso del orba katar o baripe e Devleko, ta katar sa so cherda.

² E llivesa den gaia orba maskar pete, e racha inllaren e buna.

³ Ni asundon alava ni avazura,

⁴ a sa o sueto asunel len, llik kai o than mai gurudino katar e phuv. Kote o Del thoda iek than e khameke,

⁵ ta likel sar likel iek terno katar e soba e zinimengi ta veselilpe sargo iek lleno kai prastel ta istarel o drom angla pe.

⁶ O kham likel katar iek rig e milosoki ta perel lligo ni avel kai ogoia rig, ta niko nasti nasel katar leko tatipe.

⁷ O zakono e Devleko si chacho, ta del zivoto nevo. E alava e Devleke si chache, ta bizaren e llenen kai ni llanen but.

⁸ E zakonura e Devleke si chache, ta veselin e lie. O zakono e Devleko si bristo ta putarel amare akha.

⁹ O liubao katar o Del si chisto ta achel ostade. E krisa e Devleke si chachune, sa von si chache,

¹⁰ ¡von si mai kuch neko o sunakai mai lacho! ¡Leke alava si mai gugle neko o aullin! Kai thavdel katar o kuibo e bindivorengo.

¹¹ Den pe mande ta sikaven man ta blazil but te kanda len.

¹² ¿Ko thovel sama katar piro bilachipe? ¡Prostisar Devla o bilachipe kai cherav ta ni acharav!

¹³ Le mandar o baripe, na muk te gazdaril pe mande o baripe. Ta gia ni ka avel pe mande ni iek dos, ta ni ka avav ando baro bilachipe.

¹⁴ Me alava ta me mislura te aven chuke drago. Devla, tu arakhe man tu san mo braduimari.