Salmos 149 - Biblia ande chib Romani

O Del cherda e ezgode ta si Charo

¹ ¡Aleluia! Llilaben e Devleke iek llili nevi, llilaben leke ando pero katar e chache.

² Te veselinpe e israelitura, o foro katar o Sion, soke o Del cherda le ta si leko Charo.

³ Blagosin le ando chelipe Devlikano, llilaben leke prema e arpa ta o pandero.

⁴ Soke o Del veselilpe pe foroia, ta ka blagosil e llenen kai ni istardon ande po braduipe.

⁵ Veselinpe e chache ande leko baripe i ando than kai soven llilaben veselimaia.

⁶ Blagosipe e Devleke te likel katar tumaro mui, ta ande tumare va te avel iek jarni ostro pe dui riga,

⁷ te sai pochinen e bilache llenenge, ta te dukhaven maskar e phuvia,

⁸ te phanden e charonen ta golen kai gazdarin, ande bare lanchura sartrune,

⁹ te sai cherdon ande lende e alava kai si pisime, ¡ta gaia ezgoda ka avel iek veselia sa e llenenge kai si chache! ¡Aleluia!