Salmos 141 - Biblia ande chib Romani

Me akha dikhen pe tute

Llili katar o David.

¹ Devla, chuke moliv man, ¡Aide oma! ¡Asun mo avazi kana ka ikharav tut!

² Te avel mo molipe sargo o taimano angla tute, ta me va vazdine, sargo iek ezgoda dini pasa e riat.

³ Devla, arak mo mui, arak me alava kana ka dav orba.

⁴ Duriar me mislura katar o bilachipe, na muk te perel mo lio ande ezgode bilache, ni te besav pe sinia katar e bilache llene.

⁵ Iek sebapi si kana dukhavel man iek lleno chacho, te del pe mande si sargo iek meriso lacho kai ni dukhavel mo soro. A me ka moliv man suako llive te de pe llene bilache.

⁶ E bilachenge krisaria ka aven chudine katar e jar tele, ta ka llanen kai me alava sea lache.

⁷ Amare kokala si rispime pasa o limori, sargo kana putaren e phuv.

⁸ Devla ta Gazda, me akha dikhen pe tute. Ande tute uzdiu man, na muk man korkorre.

⁹ Arak man katar o kojaipe kai thode mange, Arak man katar o kojaipe katar e bilache llene.

¹⁰ Te peren e bilache isto ande piri mreza, a me te llav angle.