Salmos 139 - Biblia ande chib Romani

O Del llanel sa

Katar o lleno kai sikavel te llilaben. Llili katar o David.

¹ Devla, tu pinllare man ta llane sar sem,

² tu llane kana besav ta kana ustav, duratar tu llane so misliu man.

³ Tu llane kana phirav, ta llane kana achav, tu llane sa so cherav.

⁴ Mai anglal te dav orba, tu Devla, llane so mangav te phenav.

⁵ Pe suako rig san truial mandar, che va si thode upral pe mande.

⁶ Gia baro bizaipe si tut kai nasti resav le, ¡but baro si mange ta nasti acharav le!

⁷ ¿Kai sai durivav tutar, te na avav pasa cho duo? ¿Kai sai nasav, te na avav pasa tu?

⁸ Te likava ando miloso, kote san tu, te fuliava tele ando limori, i kote san tu,

⁹ te furiava karing likel o kham, o te ziviva dur karing perel o kham,

¹⁰ i kote cho va ka resel mande, ¡cho va o chacho ni mukel man!

¹¹ I te mangava te gurudivav ando truniariko katar e riat, llik e riat ka kletosarel sargo ando llive.

¹² O truniariko nasti guruvel man tutar ta e riat ka kletosarel sargo ando llive ¡avela truniariko o ollivesea, chuke sa iek si!

¹³ Tu cherdan mi esnaga, tu cherdan te cherdivav ande me dako lli.

¹⁴ Blagosiv tut soke si but glamno so cherdan. Soke si iek bari ezgoda ta chudiu man, ¡ta llanav kai gaia ezgoda si chachi!

¹⁵ Tu dikhea sar bariola mi esnaga kana sema gurudino ta cherdivava ta sema khuvdo chak telal katar e phuv.

¹⁶ Tu dikhea sar cherdola mi esnaga, sa gaia ezgoda saia pisime ande cho lil. Ta sa cherdile gia sar pisisardan len mai anglal te cherdon.

¹⁷ ¡Ioi Devla! gia sukar si mange che mislura, ¡sa che mislura inai len son!

¹⁸ A te mangava te llinav len, si mai but neko e chisai, a te resava te llinav len, llik kote pale avava tuia.

¹⁹ ¡Ioi Devla! le o zivoto katar e bilache, duriar mandar golen kai mundaren,

²⁰ golen kai si che dusmanura ta kusen cho anav.

²¹ Devla, me murziu pe gola kai murzin pe tute ta inai mange drago gola kai kusen tut.

²² ¡Murziu pe lende sa me liea! ¡Von si mange me dusmanura!

²³ ¡Ioi Devla! dik sar sem, dik pe mo lio, zumav man, dik pe me mislura,

²⁴ dik dal llav po bilacho drom, ta sikav mange o drom ostade.