Salmos 132 - Biblia ande chib Romani

O alav kai dia o Del e Davide

Llili katar e droma pe burdura.

¹ Devla, de tut golli katar o David ta katar sa o bilachipe kai nakhla,

² de tut golli katar e bare sovel kai jala chuke Devla, kai san o zuralo katar o Jakob:

³ Ni ka dav ande chara ta ni ka inzivav te lelpe mandar o chiñipe,

⁴ ni ka phandav me akha ta ni ka sovav niso,

⁵ lligo ni ka malavav iek than e Devleke, o zuralo katar o Jakob.

⁶ Ando Efrata asundam kai dena orba katar e arka katar o alav e Devleko ta maladam la ande umalia katar o vos.

⁷ ¡Aven kai e chara e Devleki! ¡Da changenchar angla leke porrne!

⁸ Uste Devla, ta an chi arka, chi zor, ta aide kai o burdo kote kai ka ache te bese.

⁹ Che popura te furiadon ando chachipe, ta te veselinpe gola kai si chuke chache.

¹⁰ Pala o David cho sluga kai voli le, na de e zea kai o charo kai esvirisardan.

¹¹ Bare sovel jala o Del e Davideke ta ni ka phagel gola sovel: Ka thovav pe cho trono iekhe katar cho porodo.

¹² Te cherde che chaurre prema o alav kai diem, ta prema e zakonura kai ka dav len, i lenge chaurre ka aven pe cho trono ostade.

¹³ ¡O Del esvirisarda o burdo o Sion! ¡Ta mangla te zivil kote!

¹⁴ Gava si o burdo kai mangav te ziviu ostade, kote ka ziviu soke gia manglem le.

¹⁵ Ka blagosiv but leko jape, ta e llenen chorre kai si kote ka avel len marrno te jan.

¹⁶ Ka furiavav ando braduipe leke poponen ta o foro e Devleko ka urkil veselimatar.

¹⁷ Ta kote ka cherav te avel pale e zor katar o David. Lachardem iek lampara e charoke kai esvirisardem.

¹⁸ Ka mukav ando lallao leke dusmanonen, a leke ka cherav te klichil leki korona.