Salmos 11 - Biblia ande chib Romani

Ando del si sa e vera

Katar o lleno kai sikavel te llilaben. Llili katar o David.

¹ Ando Del uzdiu man. Samo gia phenen mange: Nas pe burdura sargo e chiriklia.

² Dik pe bilache llene, sar thoven e llida pe dori chirden e dori po arko, ta katar iek than gurudino chuden e llide ande llene chache.

³ Te si phage e barra kai istaren e zidura, ¿So sai cheren e llene chache?

⁴ O Del si ande po santo cher. E Devleko trono si ando miloso, leke akha si putarde ta dikhel po sueto.

⁵ O Del dikhel pe lache ta i pe bilache, ta murzil sa pe liea pe llene kai drago lenge o marenpe.

⁶ Ta o Del ka cherel te del peke pe bilache angara phabarde, iag ta asufre, ta ka cherel te phurdel iek balav kai ka phabarel sa. ¡O Del ka pochinel lenge!

⁷ O Del si chacho ta volil so si chacho, goleke e llene chache ka aven angla le ta ka dikhen leko mui.