Salmos 105 - Biblia ande chib RomaniSo cherda o Del pala o Israel 1 Kr 16.8-22 1 ¡Den fala e Devle! ¡Chera te phinllaren leko anav! Phenen ande forura so cherda o Del. 2 Den le liubao ande llilia. ¡Den orba katar e bare ezgode kai cherda! 3 ¡Cheren baripe ande leko baro anav! ¡Te veselinpe e lie katar e llene kai roden e Devle! 4 Roden e Devle, ta kai leki zor roden e Devle sa o vreme. 5 Den tumen golli katar e bare ta glamne ezgode kai cherda, ta katar e zakonura kai phenda, 6 tumen, o porodo katar leko sluga o Abraam, tumen, o porodo katar o Jakob, kai sen leke esvirime. 7 ¡Vou si o Gazda, amaro Del! ¡Vou gazdaril pe sa e phuv! 8 I te nakhena milia porodura ni ka bristarelpe kai dia po alav kai dia, 9 o alav kai dia e Abraame, ta e sovel kai jala e Isaakeke 10 ta kai chacharda sargo zakono e Jakobeke, iek alav ostade e Israeleke, 11 kana phenda: Ka dav tut e phuv katar o Kanaan gia sar si te le so perel tut. 12 A von sea cherricha llene, von sea avere phuvienge, 13 ta llana foro forote ta phuv phuviate, 14 o Del ni mukla te dukhavel len niko, ta phenda le silnomaia e charonenge: 15 Na dodin golen kai si me esvirime ta na dukhaven me porauken. 16 Cherda te avel bok ande goia phuv, ta zatrisarda sa lengo jape. 17 A bichalda angla lende e Josee, gole kai bichindea sargo sluga. 18 Dukhade leke porrne e lanchonenchar, ¡ta thode pe leki korr e sastrura! 19 O alav e Devleko zumada e Josee, lligo ni cherdilo so phendaia o Jose. 20 O charo kai sea tala leko va but llene, phenda te mukliaren le, 21 ta cherda te gazdaril pe leko cher ta pe sa so saia le, 22 ta gia, te sikavel ta te del bizaipe e gazden ta e phuren. 23 Mapalal avilo o Israel kai vou si o Jakob, ta zivisarda ando Ejipto, ande phuv katar o Kam. 24 O Del bariarda pe foro, ta cherda le mai zuralo neko o Ejipto. 25 A o Del cherda te murzin e ejipsiura pe leko foro ta te cheren o bilachipe e llenenge kai sea sluge e Devleke. 26 Ondaka o Del bichalda pe sluga e Moisese, ta e Aarone kai esvirisardaia, 27 ta von cherde bare ezgode, cherde glamne ezgode ande phuv katar o Kam. 28 O Del bichalda iek baro truniariko, a e ejipsiura ni thode sama pe leke alava. 29 Cherda rat o pai katar lenge lena, ta mundarda e machen. 30 Cherda te aven zambuke ande sa e phuv llik ande sobe katar o charo. 31 O Del phenda, ta avile but makha ta lluva kai pherde sa o Ejipto. 32 Cherda te delpeke krupe ta iag pe lengo phuv. 33 Zatrisarda lenge drakha ta lenge simochine ¡zatrisarda e kasta katar o Ejipto! 34 O Del phenda, ta avile e langoste ta e cherme bi llinde, 35 ta jale sa o zelenipe katar e umalia ta sa so dia e phuv. 36 Cherda te meren e chave e mai purane katar suako familia ande lengi phuv, 37 a len, ikanda len pherde rup ta sunakai ta ande lenge viche niko ni eskombaia. 38 E ejipsiura veselisaile kana von lleletar soke merena daratar lendar. 39 Cherda te ucharel len iek oblako ta iag te del len villelo orachaia. 40 Mangle katar o Del, ta cherda te aven te aven e chiriklia, ta dia len marrno katar o miloso. 41 Putarda e pechine ta likisto o pai, ta llelo sargo iek len po pusto, 42 soke diape golli katar po santo alav kai dia e Abraame leko sluga. 43 Ikanda pe foro veselimaia, ande veselia pe llenenchar e esvirime. 44 Dia len e phuv katar aver forura ta lie sa o chari kai cherde aver forura, 45 te sai kanden so vou phenda ta te cheren so phenen leke zakonura. ¡Aleluia! |
Biblia ande chib Romani © Sociedad Bíblica Chilena, 2018.
Chilean Bible Society