Salmos 104 - Biblia ande chib Romani

Blagosi e Devle

¹ ¡Ka blagosiv e Devle sa me liea! ¡Gia baro san Devla, tu san mo Del! Furiado san ando villelo ta ande zor,

² uchardo san ando klichipe ¡Tu buliardan o miloso sargo iek chiti!

³ ¡Tu thodan upral pe paia e direkura katar cho cher incha upre! Tu chere e oblakura te cherdon cho bordon, ¡tu furia pe pakha e balaviake!

⁴ E baliava inllaren che alava, ta e plamekura e iagake si che sluge.

⁵ Thodan e phuv upral po zuralipe te na miskolpe nikada kotar.

⁶ E mora e bari ucharela e phuv sargo kana saia iek fistano. O pai ucharela e burdura.

⁷ A tu dian pe late, ta llelitar, nasli oma kana asunda o germipe katar cho avazi.

⁸ E mora likisti pe burdura ta fulisti pe umalia, llelitar kote kai tu phendan lake te llal,

⁹ llik kote kai phendan lake te na nakhel, te na ucharel pale e phuv.

¹⁰ Tu bichale o pai kai likel katar e phuv te llal kai e lena kai fulien katar e burdura.

¹¹ Katar gua pai pien e zivirinie katar o vos, ta lea phagen pi trus e magarchura dive.

¹² Pasa e lena e chiriklia cheren pe kuibura, ¡Ta kote llilaben maskar e krangura e kastenge!

¹³ Tu chere te perel o pai pe burdura katar cho cher kai si ando miloso, cho bursin phagel e trus katar e phuv.

¹⁴ Tu chere te bariol e char te jan e zivirinie, ta e septelie kai o manus thovel te barion, te ikanen o marrno katar e phuv,

¹⁵ o marrno kai del zor, e mol kai veselil leko zivoto, ta o zeitino kai cherel te klichil leko mui.

¹⁶ E kasta phagen pi trus, e sedrura katar o Libano kai o Del thoda te barion.

¹⁷ Pe lende cheren pe kuibura e chiriklia ta pe lende thovenpe e garvanura.

¹⁸ Pe bare burdura zivin e busne, ta maskar e barra zivin e sosoia.

¹⁹ Cherdan o chon te llina o vreme, ta o kham llanel kana si te perel.

²⁰ Buliare e riat sargo iek chiti, ta ondaka liken e zivirinie te urlin ando vos.

²¹ E lionura basen pala o mas, mangen e Devletar te del len te jan.

²² A kana likel o kham, llantar inzon ta gurudon.

²³ Ondaka likel o manus te radil ta cherel le llik kana perel e riat.

²⁴ ¡Gachin ezgode cherdan tu Devla! Sa cherdan len bizaimaia, ¡e phuv si pherdi katar e ezgode kai cherdan!

²⁵ Kote si e mora, bari ta buli, kai si zivirinie bi llinde, bare ta minone,

²⁶ kote llan e llimie, ta kote zivil o Leviatan kai tu cherdan te chele tut lea.

²⁷ Saurre aduricharen tutar te de len te jan kana ka avel lengo vreme.

²⁸ Tu de len, a von len, putare cho va, ta len ta chalion,

²⁹ te gurudo lendar, daran, te le lendar o duo, meren ta pale cherdon prajo.

³⁰ A te bichale cho duo zivotoko, cherdon ta gia nevare e phuv.

³¹ ¡E zor e Devleki si ostade! ¡O Del veselilpe pala so cherda!

³² E phuv izdral kana vou dikhel pe late, ¡E burdura chuden thuv kana vou dodil len!

³³ Sogo avava llundo, ka llilabav llilia e Devleke kai si mo Gazda.

³⁴ Guglipe ka avel mange kana ka misliu man ando Del, soke samo vou del man e veselia.

³⁵ ¡Te na aven ios pe phuv e bilache llene! ¡Te na zivin ios e bilache! ¡Ka blagosiv e Devle sa me liea! ¡Aleluia!