Salmos 103 - Biblia ande chib Romani

Ka blagosiv e Devle

Katar o David.

¹ Ka blagosiv e Devle sa me liea, Ka blagosiv ande mo zivoto leko santo anav.

² Ka blagosiv e Devle sa me liea, ni ka bristarav nikada sa o lachipe kai cherel.

³ Vou si kai prostil sa mo bilachipe, vou sastarel sa me dukha,

⁴ vou kurtulil man katar o meripe, vou pherel man volipe ta lachipe,

⁵ vou del man o mai lachipe ta terniarel man sargo e agila.

⁶ O Del krisil chachimaia golen kai si dukhade pala o silnope.

⁷ Sikada pire droma e Moiseseke ta o Israel dikhla e ezgode kai o Del cherda.

⁸ O Del si iek Del kai volil ta si leke zalba, vou ni joliaol oma ta si pherdo volipe.

⁹ Ni del pe amende suako llive ta leki joli inai ostade,

¹⁰ ni pochinda amenge prema amaro bilachipe,

¹¹ o volipe e Devleko pe llene kai den le liubao si gia baro sargo o miloso kai si upral pe phuv.

¹² Duriarda amendar amaro bilachipe, gia sar si dur e rig katar likel o kham katar e rig kai perel o kham.

¹³ O Del volil e llenen kai den le liubao gia sar iek dad volil pe chaurren,

¹⁴ soke vou llanel katar so sam cherde: vou llanel kai sam cherde katar o prajo.

¹⁵ O zivoto e manuseko si sargo e char, sargo iek lulunllin kai likel ando vos:

¹⁶ A samo chinol la e balav, merel, ta niko ni llanel latar ios.

¹⁷ A o volipe e Devleko si ostade pe gola kai den le liubao, leko chachipe si ostade pe lende ta pe lenge chaurrenge chaurre,

¹⁸ golenge kai ni phagen e Devleko alav ta kai ni bristarenpe te kanden leke zakonura.

¹⁹ O Del thoda po trono ando miloso, ta vou charoil pe sa.

²⁰ ¡Blagosin e Devle, leke suechura zurale, kai cheren so vou phenel kana asunen leko avazi.

²¹ ¡Blagosin e Devle sa gola kai radin leke, ta kai cheren so vou phenel!

²² ¡Blagosin e Devle sogo si cherdo letar, ande sa e thana kai vou charoil! ¡Ka blagosiv e Devle sa me liea!