Salmos 102 - Biblia ande chib Romani

O molipe katar iek lleno dukhado

¹ Devla, asun sar moliv man, ¡Muk te resel tute mo urkipe!

² Na gurudo mandar kana ka avav ande nuzda, ¡thov mange sama ta asun man! ¡de man anglal oma kana ka ikharav tut!

³ Soke mo zivoto llaltar sargo o thuv, ta me kokala phabon sargo iag kastengi,

⁴ inai man zor ande mo lio cherdilo sargo e char suki, ¡bristrailem i te jav!

⁵ E mozga lipilpe pe me kokala kai gachin rovav.

⁶ Sem sargo iek puaucho po pusto, sargo iek puaucho maskar o phagipe.

⁷ Ni sovav. Sem sargo iek chirikli kai phirel korkorre upral po cher.

⁸ Me dusmanura kusen man suako llive ta phenen mo anav ta den lea armaia.

⁹ Ni jav marrno, jav o prajo e iagako, ande mo pipe aminpe me ausa

¹⁰ pala chi joli ta cho silnope, soke vazdian man ta mapalal peradan man.

¹¹ Me llivesa nakhen sargo iek senka sukivav sargo e char.

¹² A tu Devla, charoi ostade, ¡ta sa e viche ka denpe golli tutar!

¹³ Ka uste ta ka avel chuke zalba katar o Sion, soke avilo o vreme,

¹⁴ Che sluge volin leke barra, ta dukhal len soke dikhen leko o phagipe.

¹⁵ Sa e phuvia ta e charura katar o sueto ka blagosin o glamno anav e Devleko,

¹⁶ kana vou ka vazdel pale o Sion ta ka dikhen le ande leko baripe,

¹⁷ o Del ka thovel sama sar molinpe e llene kai inai len niso ta ni ka phandel pe kan.

¹⁸ Te achel pisime gaia ezgoda e llenenge kai ka aven mai angle, te sai blagosin e Devle gola kai si te biandon.

¹⁹ O Del dikhla pe phuv katar o miloso, katar o than santo kote kai si vou,

²⁰ te sai asunel o roipe katar e phangle ta te mukliarel golen kai chinde lenge o meripe,

²¹ ta gia ando Jerusalem, te bariaren e Devleko anav ta te llilaben leke ando Sion,

²² kana ka chidiniaon katar sa e phuvia te blagosin le.

²³ Vou lia mandar e zor po drom, chikniarda me llivesa.

²⁴ A me phenav leke: Murno Del, na inllar man akana kai sem terno. ¡Chire bursa inai len son!

²⁵ Tu thodan pe po than e phuv mai anglal isto tu cherdan o miloso.

²⁶ Sa gala ezgode ni ka aven ios, a tu ka ave ostade. Sa gala ezgode ka jalion sargo e patave, ¡a tu ka pharruve len ta ni ka aven ios!

²⁷ A tu nikada ni pharrudo, che bursa nikada ni meren.

²⁸ E chave katar che sluge ka zivin bi darako, ta angla tu ka zivin.