Salmos 10 - Biblia ande chib Romani

O molipe te sai pomozil o Del

¹ Devla, ¿soke ache gia dur? ¿Soke gurudo kana avel e nuzda?

² Barikamaia o lleno bilacho llal zilnomaia pala o chorro, a si te achel phanglo ando kojaipe kai isto vou thoda.

³ O bilacho lleno falilpe katar ezgode kai zelil, blagosil gole kai merel pala e love, ta ni chitilpe leke o Del.

⁴ Istardol ta phenel: Inai Del. Inai ko te del pe mande. Gua si sa leko mislo.

⁵ Sogo cherel likel leke sukar. Vou mislil kai che krisa si dur, but dur letar. Marel espurnia katar pe dusmanura,

⁶ ta mislil kai niko ni ka cherel le te perel, kai nikada ni ka avel le iek nuzda.

⁷ Leko mui si pherdo armaia, kojavel ta dukhavel, leke alava si pherde bilachipe ta dukhaven e llenen.

⁸ Prezol maskar e forichura, ta gurudino mundarel gole kai inai dosalo. Ni lel pe akha katar o lleno kai inai le niko.

⁹ Sargo iek liono gurudino, dikhel so cherel o chorro, ta aduricharel o vreme te jutel upral pe lete, ta kana istarel le, terril le ande pi mreza.

¹⁰ Prezol, bangol, ta pusavel pe unlle ande llene jasarde.

¹¹ O bilacho lleno mislil kai o Del bristarelpe, kai ucharel pe akha ta kai ni dikhel niso.

¹² ¡Uste Devla, vazde cho va! ¡Na bristar tut katar e chorre!

¹³ ¿Soke Devla maren espuria e bilache llene, ta mislin kai tu ni ka phene lenge niso?

¹⁴ Isto tu dikhlan lengo bilachipe, ¡tu dikhlan le, ta ka pochine lenge! Tute aven e llene kai inai len niko, tu pomozi golen kai inai len ni dad ni dei.

¹⁵ ¡Phag e bilachengo va! ¡Mang lendar te pochinen po bilachipe lligo ni ka pochinen sa!

¹⁶ O Del si Charo ostade, ¡e llene kai ni pachan ando Del ka aven tradine katar leki phuv!

¹⁷ Devla, tu asune kana molinpe e llene kai inai barikane, tu dikhe pe lende ta de len zor.

¹⁸ Cher cho chachipe golenchar kai inai len ni dad ni dei ta golenchar kai si dukhade: ¡o manus kai si cherdo katar e phuv, te na cherel pale o bilachipe!