Рындоря 8 - Biblia ande chib Romani

¹ O Saulo saia kote ta dikhela sar mundarena e Estebane ta phenda kai saia sukar so cheren. Isto gua llive rodie but e llenen katar e khanlliri kai si ando Jerusalem. Ta sa e llene kai pachana ando Jesus rispisaile ande Judea ta ande Samaria.

O Saulo rodel te mundarel e llenen katar e khanlliri

² Nesave llene kai avila lenge zao prajosarde e Estebane ta rovde but pala le.

³ A o Saulo llala te rodel e llenen katar e khanlliri, ta dela cher cherete ta ikanela terrindo llenen katar e chera e murusen ta e diskinien ta bichalela len ande rubie.

⁴ A e llene kai saia te llantar katar o Jerusalem phenena e lachi viasta kaigo llana.

⁵ O Felipe, iek lendar, llelo ando foro mai baro katar e Samaria ta dia orba e llenenge katar o Jesus.

⁶ E llene chidiniaona, ta sa asunena ta thovena sama so phenela o Felipe, soke dikhena e bare ezgode Devlikane kai cherela.

⁷ But llene kai sea ande lende duura bilache sastona, ta e duura likena lendar ta urkina, ta i but llene kai nasti phirena ta i e bange sastona.

⁸ Sa gala ezgode cherde te avel but veselia ande gua foro.

⁹ A kote saia iek lleno kai ikhardola Simono, kai omanglal cherela chirimate ta kojadaia e llenen katar e Samaria ta phenela kai vou si iek lleno but asundo.

¹⁰ Sa e llene, katar o minono llik kai o mai baro, thovena leke but sama ta asunena le ta phenena: Gava si o lleno kai phenen leke e bari zor e Devleke.

¹¹ Ta thovena leke sama soke kojadaia e llenen but vreme pe chirimatenchar.

¹² A kana o Felipe phenda lenge e lachi viasta katar e charoina e Devleki ta katar o Jesukristo, e murus ta e diskinie kristisaile.

¹³ Ta isto o Simono pachaia ta kristisailo, ta llelo e Felipea, ta chudilape katar e bare ezgode Devlikane kai dikhela.

¹⁴ Kana e apostolura kai sea ando Jerusalem asunde kai e llene katar e Samaria pachaie ande alava e Devleke, bichalde incha e Pedro ta e Juane.

¹⁵ Kana avile, molisaile pala e llene kai pachan kai si katar e Samaria, te len o Santo Duo.

¹⁶ Soke ni ios ni aviloia o Santo Duo pe ni iek lendar, samo kristisailea ando anav e Gazdako o Jesus.

¹⁷ Ondaka o Pedro ta o Juan thode pe va pe lende, ta gia lie o Santo Duo.

¹⁸ Kana o Simono dikhla kai o Santo Duo avela kana e apostolura thovena pe va pe llene, phenda kai ka del len love,

¹⁹ ta phenda lenge: Den i man goia zor, ta gia gola llene kai ka thovav me va pe lende i von ka len o Santo Duo.

²⁰ Ondaka o Pedro phenda leke: ¡Te ave proketo, tu ta i che love, soke manglan te chine e lovenchar so si dino llabe e Devletar!

²¹ Inai tutar gala ezgode, soke angla o Del cho lio inai chacho.

²² Muk o bilachipe kai chere, ta molisao e Devleke, te dikhe dal ka prostil chuke so mangea te chere.

²³ Soke me dikhav kai san pherdo zalba ta o bilachipe istarda tut phanglo.

²⁴ O Simono phenda leke: Molintumen e Devleke pala ma, te na nakhav gola ezgode kai phenden mange.

²⁵ Kana llanatar katar e Samaria o Pedro ta o Juan phende e llenenge sa so nakhle kana sea e Jesusea. Ta e apostolura phende e lachi viasta ande but forichura kai si pasa e Samaria ta irisaile ando Jerusalem.

O Felipe ta o etiope

²⁶ Mapalal, iek suecho e Devleko phenda e Felipeke: Uste ta llatar ando sur, katar o drom kai llal katar o Jerusalem karing e Gasa. Gava drom nakhel katar o pusto.

²⁷ O Felipe ustilo ta llelotar, ta e dromea maladilo iekhe llenea kai saia katar e Etiopia. Le saia iek rado but glamno, vou saia o lleno kai llinel e love katar e diskinia kai gazdarila ando Etiopia, ta lleloia ando Jerusalem te blagosil e Devle.

²⁸ Kana irilape kai pi phuv, ande po bordon chitila so pisisarda o profeta o Isaias.

²⁹ Ta o Duo phenda e Felipeke: Lla ta thov tut pasa gua bordon.

³⁰ Kana o Felipe avilo pase, asunda sar o etiope chitila so pisisarda o Isaias, ondaka puchla le: ¿Achare so chiti?

³¹ O etiope phenda leke: ¿Sar ka acharav, kana inai ko te sikavel man? Ta mangla letar te likel ta te besel pasa le.

³² Ta gava saia o pisipe kai chitila: Inllarde le sargo iekhe bakre kai inllardol te mundaren le. Sargo iek bakro kai ni basel angla e llene kai chinen leke bal, ta gia ni putarda po mui.

³³ Thode le ando lallao, ta ni chinde leke iek kris chachi. ¿Ko ka del orba katar leko porodo? Soke ikande leko zivoto katar e phuv.

³⁴ O etiope puchla e Felipe: Phen mange, ¿kaki orba del o profeta: Del orba vou petar o katar aver lleno?

³⁵ Ondaka o Felipe, prema so chitila o etiope, phenda leke e lachi viasta e Jesukristoki.

³⁶ Mapalal, kana nakhena pasa iek pai, o etiope phenda: Kate si pai, ¿si vareso te achavel man te na avav kristime?

³⁷ O Felipe phenda: Te pachaia sa che liea, sai. Vou phenda: Me pachau kai o Jesukristo si e Devleko Chavo.

³⁸ Ondaka phenda te achaven o bordon, ta e li dui fuliste ando pai, ta o Felipe kristisarda le.

³⁹ Kana likiste andar o pai, o Duo e Gazdako inllarda e Felipe, ta o etiope ni dikhla le ios, a llelo e dromea veselimaia.

⁴⁰ O Felipe avilo ando Asoto, ta llelo foro forote ta phenela e lachi viasta, lligo ni avilo ande Sesarea.