Рындоря 7 - Biblia ande chib Romani

O Esteban chacharelpe

¹ O mai baro popo puchla e Estebane dal saia chachipe so phenena letar,

² a vou phenda: Phlalalen ta dadalen, asunen man: Amaro Del o blagosime kana sikadilo ande Mesopotamia amare puraneke e Abraameke mai anglal te avel ando Aram,

³ ta phenda leke: Muk che phuvia ta che familia, ta llatar kai e phuv kai me ka sikavav chuke.

⁴ Ondaka o Abraam llelotar katar e Kaldea ta llelo te zivil ando Aram. Mapalal mulo leko dad ta o Del anda e Abraame ande gaia phuv, kate kai tumen zivin akana.

⁵ A ni lia ni iek chari katar gaia phuv, ni kai te thovel po porrno. A o Del dia le o alav ta phenda kai ka del la leke, ta gia kana vou ka merel goia phuv ka achel leke porodoke a ande gua vreme e Abraame inai sea le minone.

⁶ Ta o Del phenda leke kai leko porodo ka zivil sargo ande averengi phuv ande iek phuv kai ni pinllaren, ta kai ka aven sluge, ta kai ka aven mardine star stotine burs.

⁷ Ta i phenda leke o Del: Me ka cherav te nakhel patnia o foro kai ka cherel tumen sluge, ta mapalal cho porodo ka likel kotar ta ka radil mange pe gava than.

⁸ Kana o Del dia po alav e Abraameke phenda leke te cheren e sirkunsision. Goleke kana nakhle ojto llive sar kana biandilo leko chaurro o Isaak, o Abraam cherda leke e sirkunsision. Isto gua cherda o Isaak pe chaurrea e Jakoboia, ta o Jakob cherda le pe chaurrenchar kai sea e dada katar e desudui viche katar o Israel.

⁹ Gala chaurre kai sea amare purane, murzisarde pe po phlal o Jose ta bichinde le te inllaren le ando Ejipto. A o Del kai saia e Joseea,

¹⁰ pomozisarda le ande sa leke nuzde ta dia le bizaipe ta cherda te uzdilpe ande lete o Faraon, o charo katar o Ejipto, ta cherda le te gazdaril po Ejipto ta pe charoina e charoki.

¹¹ Ondaka saia bok ta bari burkania ande sa e forura katar o Ejipto ta ando Kanaan, ta amare purane ni saia len so te jan.

¹² A kana o Jakob llangla kai ando Ejipto saia jape, bichalda pe chaven incha, gola chave sea amare purane. Ta goia saia e purvo drom kai llele ando Ejipto.

¹³ Kana llele pale o duito, o Jose phenda pe phalenge ko saia vou, ta gia o Faraon llangla katar savi vicha saia o Jose.

¹⁴ Mapalal, o Jose phenda te anen ando Ejipto leke dade e Jakobe ta sa leke familia kai sea eftavardes ta panch llene.

¹⁵ Ta gia o Jakob llelo te zivil ando Ejipto, ta kote mulo vou ta i amare purane.

¹⁶ Ta prajosarde len ando Sikem, ta thode len ando limori kai o Abraam chindaia katar e chave e Jamoroke.

¹⁷ Kana avilo pase o vreme kana saia te cherdol so phenda o Del kana dia po alav e Abraameke, o foro katar o Israel bariloia ando Ejipto ta cherdilea but llene.

¹⁸ Ta ondaka ando Ejipto thoda te gazdaril iek charo kai ni pinllarela e Josee.

¹⁹ Gava charo kojada amare foro ta marda amare puranen, ta cherda te llantar pe zor ta te muken chudine pe minonen te meren kai iakom biandilea.

²⁰ Ande gua vreme biandilo o Moises. Vou saia iek minono but sukar ta leke dada bariarde le ande po cher llik ka e trin chon.

²¹ Kana saia te muken le, e chei e Faraonoki lia le ta bariarda le sargo kana saia isto lako chaurro.

²² Ta gia o Moises avilo sikado ando sikadipe katar e ejipsiura ta cherdilo iek lleno zuralo ande pe alava ta ande so cherela.

²³ Kana sea leke saranda burs, mangla te llal kai e llene katar o Israel, kai sea katar leko foro.

²⁴ A kana o Moises dikhla kai iek ejipsio marela iekhe llene katar o Israel, llelo te marelpe lea ta mundarda le te pochinel so cherda.

²⁵ Ta o Moises mislila kai leke phlal e israelitura ka acharen kai lea o Del ka mukliarel leke foro, a von ni acharde.

²⁶ Thiarinako, o Moises malada duie llenen kai sea israelitura kai marenape, ta sar vou mangela te del murtik, phenda lenge: Tumen sen phlal, ¿soke chalaven iek avere?

²⁷ Ondaka gua kai chalavela ogole espidia e Moisese ta phenda leke: ¿Ko thoda tut te ave amaro gazda ta te ave krisari maskar amende?

²⁸ ¿A so mange te mundare man sar mundardan arachi e ejipsio?

²⁹ Kana o Moises asunda gua naslo ta llelotar ando Madian. Kote zivisarda sargo iek lleno kai inai ande pi phuv, ta ande goia phuv avila le dui chaurre.

³⁰ Nakhle saranda burs, ta ando pusto, pasa o burdo katar o Sinai, sikadilo e Moiseseke iek suecho ande iag katar iek karrne kai phabona.

³¹ O Moises chudisailo katar so dikhela, ta kana llelo mai pase te dikhel mai sukar, asunda o avazi e Gazdako kai phenela:

³² Me sem o Del che puranengo. O Del katar o Abraam, katar o Isaak ta katar o Jakob. O Moises izdraio daratar, ta ni tromala ni te dikhel.

³³ Ondaka o Gazda phenda leke: Ikan che minie soke kote kai san gua than si Santo.

³⁴ Dikhlem sa e patnia kai nakhel mo foro, kai si ando Ejipto. Asundem len sar kukin ta fulistem te mukliarav len. Goleke, aide, soke ka bichalav tut ando Ejipto.

³⁵ E israelitura omanglal ni kamle e Moisese, ta phendea leke: ¿Ko thoda tut te ave gazda ta krisari?, a o Del e suechoia kai sikadilo ande karrne, cherda le te avel gazda ta cherda le o lleno kai ka mukliarel len.

³⁶ Ta mapalal ikanda amare puranen katar o Ejipto, ta o Moises cherda bare ezgode Devlikane ande goia phuv katar e Mora e Loli, ta ando pusto saranda burs.

³⁷ Isto gava Moises saia gua kai phenda e llenenge katar o Israel: O Del ka cherel te likel tumendar iek profeta sargo me.

³⁸ A o Moises saia o avazi e foroko kana dela orba e suechoia po burdo katar o Sinai ta mapalal phenela amare puranenge so phenda o suecho, vou lia e alava zivotoke te del len amenge.

³⁹ A amare purane ni kamle te kanden le, ta ni kamle le ta mangle te irinpe ando Ejipto.

⁴⁰ Ta phende e Aaronoke: Cher amenge delen te inllaren amen, soke ni llana so avilape katar o Moises kai ikanda amen katar o Ejipto.

⁴¹ Ondaka cherde iek esnaga sargo guruveki, ta cherde kurbanura ta eslavisarde ando anav gole guruveko kai isto von cherde pe vastenchar.

⁴² Goleke, o Del durilo lendar ta mukla te blagosin e cheraien katar o miloso. Soke gia pisisarde e poraukura kana phende: Israelitura, ¿Ande saranda burs ando pusto cherden mange tumen kurbanura o dien man vareso?

⁴³ Tumen cherden sa napoda, inllarden tumenchar iek chara te blagosin e devle o Molok, ta inllarden e cherain katar o del Refan, esnage delenge kai isto tumen cherden te blagosin len. Goleke ka chudau tumen ande aver phuv mai dur neko katar e Babilonia.

⁴⁴ Ando pusto amare purane saia len e chara katar o zanio e Devlea, kai cherdili isto sar phendaia o Del e Moiseseke kana dia lea orba ta phenda leke te cherel la prema e chara kai vou dikhla.

⁴⁵ Amare purane lie gaia chara katar pe dada, ta gola kai avile e Josueea ande la pea kana lia peke avere phuvien, golen kai o Del tradia angla lende. Kote achilo llik kai e llivesa e Davideke.

⁴⁶ E Devleke avila drago o David, ta o David mangla te cherel iek chara e Devleke katar o Jakob.

⁴⁷ A o Salomon si gua kai cherda o cher e Devleko.

⁴⁸ A o Del ni zivil ande chera kai cherde e manusa pe vastenchar. Sar phenda o profeta:

⁴⁹ O miloso si mi estolicha, ta e phuv si kote kai thovav me porrne. ¿Savo cher ka cheren mange? phenel o Gazda. ¿Kai ka avel o than kai ka achav te lelpe mandar o chiñipe,

⁵⁰ kana isto me cherdem sa gala ezgode?

⁵¹ A tumen, phenda o Esteban, sa o vreme ni kandien ta tumare kan ta tumaro lio si sargo e llene kai ni pachan ande so phenel o Del. Sa o vreme marden tumen e Santone Duoia. Tumen sen isto sargo tumare purane.

⁵² ¿Save profeta ni marde tumare purane? Von mundarde golen kai phendea kai ka avel gua kai si chacho, a akana kai gua lleno chacho avilo, tumen phukaden le ta mundarden le.

⁵³ Tumen ni pachan ando zakono kai o Del bichalda tumenge pe suechonenchar.

O Esteban merel

⁵⁴ Kana asunde gua, e llene katar e bari kris lleletar joliarike po Esteban.

⁵⁵ A vou, pherdo katar o Santo Duo, dikhla o blagosipe e Devleko upre ando miloso, ta e Jesuse kai saia pe porrne pe rig e chachi e Devleki.

⁵⁶ Ondaka phenda: Dikhav o miloso putardo ta dikhav kai o Chavo e Manuseko si pe rig e chachi e Devleki.

⁵⁷ A von ucharde pe kan, urkisarde zurale ta prastie lete.

⁵⁸ Ikande le katar o foro ta chalade le e barrenchar. Gola kai dosarena le kojaimaia mukle te arakhel lenge patave iek terno kai ikhardola Saulo.

⁵⁹ Kana chalavena le e barrenchar, o Esteban molilape ta phenela: Gazda Jesus, le mo duo.

⁶⁰ Mapalal dia changa ta urkisarda zurale ta phenda: ¡Na thov lenge sama katar gava bilachipe! Ta kana phenda gua mulo.