Рындоря 6 - Biblia ande chib Romani

Thoven efta llenen te pomozin

¹ Ande gua vreme, sar e llene kai pachana ando Jesus cherdona mai but, e llene kai dena orba griego jolaile e llenenchar kai dena orba arameo, soke gola kai dena orba griego phenena kai e llene kai pomozina suako llive bristarenape katar lenge diskinie phivle.

² E desudui apostolura chidie sa e llenen kai pachan ta phende lenge: Inai sukar amen te muka e orba e Devleki ta te thova amen te fulava so si te pomozilpe maskar e llene.

³ Goleke, phalalen, roden maskar tumende efta llenen te avel tumen vera ande lende, te aven bizai ta pherde katar o Santo Duo te da len gaia buchi.

⁴ A amen ka moli amen ta ka inllara e orba e Devleki.

⁵ Ta sa e llenenge avila drago gaia orba, ta esvirisarde e Estebane, iek lleno pherdo pachape ta Santo Duo, ta esvirisarde sove llenen ios. Gala si lenge anava: O Felipe, o Prokoro, o Nikanor, o Timon, o Parmenas ta o Nikolas katar e Antiokia kai omanglal cherdiloia judio.

⁶ Mapalal inllarde len kote kai sea e apostolura, ta e apostolura molisaile ta thode pe va pe lende.

⁷ E orba e Devleki sa mai bariola, ta sa mai but llene sea ando Jerusalem kai pachana. Ta i but popura judiura pachaie ando Jesus.

Phanden e Estebane

⁸ O Esteban, pherdo katar o blagosipe ta e zor e Devleki, cherela bare ezgode Devlikane e llenenge katar o foro.

⁹ Nesave llene kai sea katar e khanlliri e judionengi kai ikhardola, Sluge Mukliarde, thodepe avere llenenchar katar o Sirene, katar e Alejandria, katar e Silisia ta katar e Asia, thode te janpe e Estebanea,

¹⁰ a nasti dobina le, soke dela orba e bizaimaia kai dela le o Santo Duo.

¹¹ Ondaka pochinde nesave llenenge te phenen kai asunde le kai phenela alava bilache katar o Moises ta katar o Del.

¹² Ta gia divosarde e foro, e phuren ta e kovachen katar o zakono, ta cheres gua jolaile e Estebanea ta phangle le ta inllarde le kai e mai bari kris.

¹³ Ta i rodie llenen te kojaven, ta gola llene phende gia: Gava lleno sa o vreme del bilache orbe katar gava santo cher e Devleko ta i katar o zakono.

¹⁴ Ta asundam kai phenela kai gua, o Jesus katar o Nazaret ka peravel o cher e Devleko ta kai ka pharruvel e zakonura kai mukla amenge o Moises.

¹⁵ E sudura ta sa e llene kai besena, kana dikhle e Estebane, dikhle kai leko mui saia sargo iekhe suechoko.