Рындоря 5 - Biblia ande chib Romani

O bilachipe kai cherde o Ananias ta e Safira

¹ A saia iek lleno kai ikhardola Ananias kai pe rromiaia, e Safiraia, bichinda iek umal.

² Gava lleno dia orba pe rromiaia ta lia peke nesave love ta ogola dia len kai e apostolura.

³ O Pedro phenda leke: Ananias, ¿soke muklan te gazdaril pe tute o llavolo ta te cherel tut te kojave e Santone Duoke ta achilan nesave lovenchar kai pochinde chuke pe umal kai bichindan?

⁴ ¿ni saia chiri e umal? ta sar tu bichindan la, ¿inai sea chire e love? ¿Soke cherdan gua? Ni kojadan e manusenge. Ka manglan te kojave si e Devle.

⁵ Kana asunda gala alava, o Ananias mulo, ta sa e llene kai sea kote daraile but.

⁶ Ondaka avile nesave llene terne, ulisarde leki esnaga ta inllarde le te prajon le.

⁷ Nakhle kotar preko trin saiata ta dia andre e rromi katar o Ananias, a voi ni llanela so nakhlaia.

⁸ O Pedro puchla la: Phen mange, ¿bichinden e umal pe love kai phenden amenge? Voi phenda: Ea, pe gola love.

⁹ O Pedro phenda lake: ¿Soke tumen manglen te kojaven e Duo e Gazdako? Goleke, etalen aven gola kai llele te prajon che rrome, ta akana ka inllaren i tut.

¹⁰ Ondaka isto kote e Safira muli kai e porrne e Pedroke. Kana die andre e llene terne, malade la muli, ta inllarde la te prajon la pasa lako rrom.

¹¹ Ta sa e llene katar e khanlliri, ta sa e llene kai llangle gala ezgode, daraile but.

E apostolura sastaren bute llenen

¹² Katar e apostolura cherdona but bare ezgode Devlikane maskar e llene, ta sa chidiniaona po udar kai ikhardol Salomon.

¹³ A ni iek katar ogola llene ni tromala te llan lenchar, a e llene katar o foro volina len.

¹⁴ Ta cherdile mai but e llene kai pachaie ando Gazda, murus ta i diskinie.

¹⁵ Ta ikanena e nasualen po drom ta thovena len pe kervetura ta pe postelie, soke saia te nakhel kotar o Pedro, ta gola llene aduricharena te del samo leki senka pe varesavo nasualo.

¹⁶ Ta katar e forura kai si pasa o Jerusalem avena but llene ta anena e nasualen ta e llenen kai saia ande lende duura bilache, ta saurre sastona.

Llan pala e apostolura te maren len

¹⁷ Ondaka o mai baro popo ta e saduseura kai sea lea, pherdile murzania,

¹⁸ ta phangle e apostolen ta thode len ande rubie e foroke.

¹⁹ A iek suecho e Gazdako orachaia putarda e udara katar e rubie ta ikanda len ta phenda lenge:

²⁰ Llan, ta thoven tumen pe porrne ando cher e Devleko, ta phenen e foroke sa gaia orba nevi zivotoki.

²¹ Kana asunde gala alava, thiarinako rano die ando cher e Devleko ta thodepe te sikaven. Ondaka, o mai baro popo ta e llene kai sea lea ikharde sa e phuren katar o Israel pe lengi kris e mai bari, ta bichalde te anen katar e rubie e apostolen.

²² A kana e boñikura llele kai e rubie ni malade len andre, ta irisaile te phenen so cherde

²³ ta phende: E rubie sea phangle, ta e boñikura sea anglal ta arakhena e udara. A kana putardam, ni maladam nika andre.

²⁴ Kana asunde lengi orba, o gazda katar e boñikura kai arakhen o cher e Devleko ta e mai bare popura puchenape so ka avelpe gale ezgodaia.

²⁵ Ondaka avilo iek lleno, kai phenda lenge: E llenen kai tumen thoden ande rubie, etalen ando cher e Devleko ta sikaven e foro.

²⁶ Ondaka o gazda katar e boñikura llelo pe boñikonenchar te phanden len pale, a ni ande len pe zor, soke darana katar o foro te na chalaven len e barrenchar.

²⁷ Kana avile inllarde len kai e mai bari kris, ta o mai baro popo phenda lenge:

²⁸ Amen phendam tumenge te na sikaven niso katar gua lleno kai ikhardol Jesus. ¿A so cherden tumen? Ande sa o Jerusalem dien orba katar o Jesus ta i thoven pe amende e dos katar o meripe gole manuseko.

²⁹ O Pedro ta ogola apostolura phende lenge: Amen morabi te kanda mai anglal e Devle neko e manusen.

³⁰ O Del amare puranengo cherda te ustel o Jesus katar o meripe, isto gole kai tumen umbladen ta mundarden po krusto.

³¹ O Del cherda le te ustel, ta thoda le pe pi chachi, ta cherda le te avel o lleno kai sikavel o drom ta Braduimari e foroke katar o Israel ta te cherel e foro te irilpe kai o Del ta te prostil lengo bilachipe.

³² Amen sama kote kana nakhle gala ezgode, ta i o Santo Duo kai o Del dia golen kai kanden le.

³³ Kana asunde gala orbe, jolaile but ta mangena te mundaren len.

³⁴ A maskar gola sudura saia iek fariseo kai ikhardola Gamaliel kai saia iek kovachi e zakonoko ta sa e llene e foroke dena le liubao. Gava lleno thodape pe porrne ta phenda te ikanen avri e apostolen cherricha vreme.

³⁵ Mapalal phenda ogole sudonenge: Israelitura, arakhen tumen katar so ka cheren gale llenenchar.

³⁶ Den tumen golli kai cherel nesavo vreme palpale sikadilo o Teudas, ta phenela kai vou saia iek lleno glamno, ta preko star stotine llene llele pala le, ta gale llene mundarde le, ta e llene kai llana pala le rispisaile, ta llik kote reslo sa.

³⁷ Mapalal, ande llivesa kana llinena e llenen, sikadilo o Judas katar e Galilea, ta cherda te llan pala le nesave llene, ta i gole mundarde ta sa e llene kai llana pala le rispisaile.

³⁸ A prema so llalpe akana, me phenav tumenge te muken gale llenen ta te na amin tumen lenchar. Soke te si gaia ezgoda e manusengi, ka nakhel;

³⁹ A te si iek ezgoda e Devleki, nasti ka dobin len. Arakhen tumen, te na avelpe kai maren tumen e Devlea. Von kandie le.

⁴⁰ Ikharde e apostolen, marde len e bichoia ta phende lenge te na den orba ios kataro Jesus. Mapalal mukliarde len.

⁴¹ E apostolura lleletar but vesele katar e sudura soke o Del mukla te nakhen patnia ta te den orbe bilache lendar cheres o Jesus

⁴² Ta suako llive sikavena ta phenena e lachi viasta katar o Jesus o Mesias, ta dena orba ando cher e Devleko ta i pe chera.