Рындоря 28 - Biblia ande chib Romani

O Pablo ande forura katar e Malta

¹ Kana amaro zivoto ni saia pe dar llanglam kai goia isla ikhardola Malta.

² E llene kai zivina kote avile but pachivale saurrenchar; ta sar dela peke ta cherela sil phabarde iek bari iag ta ikharde amen te ava pase.

³ O Pablo chidiaia nesave kotora kastenge suke ta chudela len ande iag kana iek sap naslo katar o tatipe ta ulisalilo pe leko va.

⁴ Kana dikhle e sape umblado pe Pabloko va, e llene kai zivina kote phende iek avereke: Gava si iek lleno bilacho kai mundarel, soke sar ni mulo ande mora, e kris e Devleki ni mukel le te zivil.

⁵ A o Pablo chinosarda petar e sape pe iag ta ni cherda leke niso.

⁶ Sa e llene aduricharena te suvliol ta oma te perel mulo; aduricharde but, ta kana dikhle kai ni saia leke niso, mislisarde aver ezgoda ta phenena kai vou si iek del.

⁷ Kotar pase sea iek umalia kai sea katar o Publio vou saia o lleno mai asundo katar e isla, ta avilo amenchar but pachivalo trin llive.

⁸ Ta o dad e Publioko saia ande postelia, ta phabola soke saia nasualo katar po lli. O Pablo llelo lete, molisailo ta mapalal thoda pe lete pe va ta sastarda le.

⁹ Cheres gua, avile i aver nasuale kai sea ande isla, ta sastile.

¹⁰ Die amen but ezgode, ta mapalal, kana likistam pale ande llimia, die amen sa so trubula amen te lla pe mora.

O Pablo avel ande Roma

¹¹ Pala e trin chon kai achilam ande isla llelamtar ande iek llimia kai nakhli kote o viend. Goia saia iek llimia katar e Alejandria, ta saia la sargo e esnaga katar dui dela o Kastor ta o Poluks.

¹² Avilam ande Sirakusa ta kote achilam trin llive,

¹³ kotar llelam pe mora ta reslam ando Rejio. Thiarinako phurdia e balav katar o sur, ta nakhlo iek llive ta avilam ando Pozzuoli,

¹⁴ kote maladam nesave phlalen kai ikharde amen te acha lenchar efta llive, ta mapalal avilam ande Roma.

¹⁵ E phlal ande Roma asundea amari viasta ta avile te maladon amenchar kote kai ikhardol Foro de Apio, ta kote kai o than kai phenena leke e trin thana kai bichinen mol. Kana dikhla len, o Pablo dia fala e Devle ta lia zor.

¹⁶ Kana avilam ande Roma, e sudura mukle e Pablo te zivil korkorre ta te arakhel le samo iek boñiko.

O Pablo ande Roma

¹⁷ Pala e trin llive, o Pablo bichalda te ikharen e mai pinllarde judionen katar e Roma ta kana sea chidine, phenda lenge: Phlalalen, me ni cherdem ta ni phendem nisavo bilachipe katar e judiura ni katar e zakonura amare puranenge. A ando Jerusalem die man kai e sudura rromanura,

¹⁸ Ta von puchle man ta mapalal mangena te mukliaren man soke ni malade niso te dosaren man.

¹⁹ A e judiura ni kamena gua, ta saia te mangav katar o kralio te chinel mange kris, a inai man sotar te dosarav e llenen katar mo foro.

²⁰ Goleke ikhardem tumen, te dikhav tumen ta te dav tumenchar orba, soke cheres o pachape ande so adurichara amen e israelitura, isto cheres gua me sem phanglo e lanchonenchar kate.

²¹ Von phende: Amende ni avilo ni iek lil katar e Judea kai del orba tutar, ta ni iek phlal judio kai avilo kotar ni phenda amenge nisavo bilachipe tutar.

²² Manga te asuna so misli tu, soke pe suako rig den orba bilachi katar goia nevi sekta.

²³ Ondaka phende e Pabloke savo llive ka chidiniaon lea, ta avile but llene kote kai vou racharela. Ta thiarinako rano llik pasa e riat, o Pablo dia lenge orba katar e charoina e Devleki ta phenela lenge katar e zakonura e Moiseseke ta katar o pisipe e profetonengo, ta prema gua mangela te cherel len te acharen ko saia o Jesus,

²⁴ Nesave llene pachaie so phenela o Pablo, a aver llene ni pachaie.

²⁵ Ta sar nasti achile pe iek orba, thode te llantar. A kana lena te llantar, o Pablo phenda lenge: O chachipe phenda tumendar o Santo Duo, kana cherda te phenel o Isaias:

²⁶ Lla ta phen gale foroke: mai te asunen, ni ka acharen; mai te prezon, ni ka dikhen.

²⁷ O lio gale foroko si zuralo, lenge akha si ucharde ta lenge akha si phangle te na dikhen ni te asunen, ni te acharen; te na irinpe mande, ta te na sastarav len.

²⁸ Mangav te llanen, kai katar angle gava prostipe si e llenenge kai inai judiura, ta von ka asunen.

²⁹ Ta kana phenda gala alava e judiura lleletar, ta janape maskar pete.

³⁰ O Pablo achilo dui burs ando cher kai chinada, ta kote vou dela orba sa e llenenchar kai mangena te dikhen le.

³¹ Bi darako dela orba katar e charoina e Devleki ta sikavela katar o Gazda o Jesukristo ta niko ni achavela le.