Рындоря 26 - Biblia ande chib Romani

O Pablo chacharelpe angla o Agripa

¹ Ondaka o Agripa phenda e Pabloke: Sai chachare tut. O Pablo vazdia po va ta phenda gia:

² Me sem veselo kai dav orba angla tu, charo Agripa, te sai chacharav man katar sa e dos kai thoven pe mande e judiura,

³ ta mai but soke tu pinllare sa e zakonura e judionenge, ta llane save orbe da maskar amende. Goleke mangav tutar te de tut o vreme ta te asune man.

⁴ Sa e judiura llanen sar zivisardem maskar lende ande mi phuv ta ando Jerusalem sar kana sema terno.

⁵ Ta i llanen, ta te kamen sai phenenle, kai me sem fariseo, goia si e sekta kai si la mai but zakonura katar amaro pachape.

⁶ Ta akana thoden man ande kris isto cheres o pachape kai si man ande so phenda o Del amare puranenge.

⁷ Amare desudui viche Israeleke aduricharen te cherdol so phenda o Del kana dia po alav, ta goleke blagosin le ta radin leke o ollivesea ta orachaia. Ta isto pala so adurichara, charo Agripa, akana e judiura dosaren man.

⁸ ¿Soke tumen ni pachan kai o Del llungavel e mulen?

⁹ Isto me omanglal misiva kai saia te zatriv e llenen kai pachana ando Jesus katar o Nazaret,

¹⁰ ta gia cherdem le ando Jerusalem ta die man pi volia e gazda e poponenge, ta thodem ande rubie bute llenen kai pachana ando Jesus; ta kana mundarena len, me phenava te cheren le.

¹¹ But droma marava len te phenen pe zor kai ni pachan, Ta cherava le ande sa e khanllira e judionenge, ta sema gia joliariko lenchar kai llava te marav len i ande aver phuvia.

¹² Ta isto goleke llava karing o Damasko, soke bichalda man e gazda e poponenge.

¹³ A e dromea, charo Agripa, po dopas e lliveseko, dikhlem iek villelo, mai zuralo neko o villelo e khameko kai klichisarda truial mandar ta e llenendar kai llana manchar.

¹⁴ Ta sa pelamtar pe phuv, ta asundem iek avazi kai phenela mange ande chib e judionengi: Saulo, Saulo, ¿Soke lla pala ma te mareto manchar? Dukhave isto tu tut, sargo te chalave e sorea ande iek zido.

¹⁵ Ondaka phendem: ¿Ko san, Gazda? O Gazda phenda mange: Me sem o Jesus, isto gua kai tu rode le te mareto lea.

¹⁶ Uste ta thov tut pe porrne, soke avilem tute te radi mange ta te de e orba chachi katar so dikhlan akana ta katar so si te dikhe mandar.

¹⁷ E judiura ta gola kai inai judiura ni ka cheren chuke niso, ta bichalav tut lende.

¹⁸ Te putare lenge akha te na phiren ios ando truniariko, ta te llan ando villelo; te na gazdaril pe lende o Satanas, ta te llan pala o Del; te pachan ande mande ta gia te len o prostipe ta te aven katar o santo foro e Devleko.

¹⁹ Goleke, charo Agripa, gua kai sikadilo mange katar o miloso sargo ando suno, me kandiem le,

²⁰ ta mai anglal phendem e orba e llenenge kai sea ando Damasko, ta mapalal e llenenge katar o Jerusalem ta e llenenge katar sa e Judea, ta i e llenenge kai inai judiura, ta ikharava len te keimpe ta te irinpe kai o Del, ta te cheren lache ezgode te achardol lenge kai sea keime.

²¹ Pala goia ezgoda, e judiura phangle man ando cher e Devleko ta mangena te mundaren man.

²² A o Del pomozisarda man ta dia man zor llik kate, ta dav iek orba saurrenge, minonenge ta i barenge. Me ni phenav lenge aver orbe, samo me phenav lenge kai e poraukura ta o Moises phende so saia te avelpe:

²³ kai o Mesias saia te merel, a kai ka merel ta mapalal ka avel o purvo lleno kai ka ustel katar o meripe, ta kai ka avel sargo o villelo ando truniariko amare foroke ta i ogole foronenge.

O Agripa del orba

²⁴ Kana o Pablo chachardape ta dia goia orba, o Festo urkisarda: ¡So san dilo, Pablo! Kai pe gachin chiti dilailan.

²⁵ A o Pablo phenda: Ni sem dilo, glamno Festo; so me phenav inai dilipe ta si o chachipe.

²⁶ Etalo kote o charo Agripa kai pinllarel but gala ezgode, ta goleke dav gala orbe bi darako angla le, soke llanav kai i vou llanel gala ezgode, soke inai ezgode kai avilepe ande iek than gurudino.

²⁷ ¿Pacha so phende e poraukura? Me llanav kai pacha.

²⁸ O Agripa phenda leke: ¿So misli kai ka chere man kristiano ande gia cherricha vreme?

²⁹ O Pablo phenda: Te avela ande but vreme o ande cherricha vreme, te mangela o Del na samo tu, i sa e llene kai asunen man allive, me voliva te aven sargo me, samo kai bi gale lanchonenchar.

³⁰ Ondaka ustilo o charo, o sudo, o Berenise ta sa e llene kai besena kote,

³¹ ta llele pe iek rig te denpe orba. Ta phenena maskar pete: Gava lleno ni cherda niso te mundaren le. Inai soke te avel ni ande rubie.

³² A o Agripa phenda e Festoke: Sai mukliardama gale llene, te na manglaia isto vou te chinel leke e kris o charo.