Рындоря 25 - Biblia ande chib Romani

O Pablo angla o Festo

¹ O Festo avilo te thovelpe sudo ande Sesarea ta pala e trin llive llelo ando Jerusalem.

² Kote e gazda e poponenge ta e judiura mai asunde llele lete te dosaren e Pablo.

³ Mangle letar iek sebapi te phenel te inllaren e Pablo ando Jerusalem. A so von mangena te cheren saia te mundaren le po drom;

⁴ A o Festo phenda kai o Pablo ka achel phanglo ande Sesarea ta kai vou ka llal incha oma.

⁵ Ta phenda lenge: Goleke tumare llene si te llan manchar ande Sesarea, ta gua lleno te cherda varesavo bilachipe, kote sai ka dosaren le.

⁶ O Festo achilo ando Jerusalem ojto llive ios, ta mapalal irisailo ande Sesarea. Thiarinako beslo pe pi estolicha ando cher kote kai chinen e krisa, ta phenda te inllaren e Pablo.

⁷ Kana o Pablo dia andre, e judiura kai avilea katar o Jerusalem thode te dosaren le katar but ezgode bilache a nasti sikade kai o Pablo saia dosalo katar so von phenena.

⁸ A o Pablo chacharelape ta phenela: Me ni cherdem ta ni phendem nisavo bilachipe katar o zakono e judionengo ni katar o cher e Devleko ni katar o charo e rromanonengo.

⁹ A sar o Festo mangela te achel lacho e judionenchar, puchla e Pablo: ¿Mange te lla ando Jerusalem ta incha te chinav chuke e kris?

¹⁰ O Pablo phenda: Me sem ando cher kai chinen e krisa kai si katar o charo e rromanonengo, kate morabi te chinen mange e kris. Tu llane kai me ni cherdem nisavo bilachipe e judionenge.

¹¹ Te si te merav pala varesavo bilachipe kai cherdem, mundaren man; a te inai chachipe gala ezgode kai dosaren man, niko nasti del man ande lenge va. Me mangav te chinel mange e kris isto o charo.

¹² Ondaka o Festo dia orba e llenenchar kai phenena leke so te cherel, ta mapalal phenda e Pabloke: Sar manglan te chinel chuke e kris o charo, isto kai o charo ka lla.

O Pablo angla o charo Agripa

¹³ Nakhle nesave llivesa, ta o charo o Agripa ta o Berenise llele ande Sesarea te den orba e Festoia.

¹⁴ Sar achile kote nesave llivesa, o Festo dia e Pabloki orba e charoke, ta phenda leke: Kate si iek lleno kai o Feliks phangla le.

¹⁵ Ta Kana sema ando Jerusalem, e gazda e poponenge ta e phure e judionenge phende mange katar so dosaren le, ta mangena mandar te phenav te mundaren le.

¹⁶ Me phendem lenge kai e sudura ande Roma inai sikade te chinaven o meripe nikake soke morabi te aven kote o dosalo ta gola kai dosaren le, te sai chacharelpe katar so dosaren le.

¹⁷ Goleke kana von avile kate, me ni jasardem o vreme, ta thiarinako beslem pe mi estolicha ando cher kai chinen e krisa ta phendem te anen gole llene.

¹⁸ A e llene kai avile te dosaren le ni phende letar nisavo bilachipe kai me misliva kai ka phenen.

¹⁹ Ta so phenena letar te dosaren le sea samo ezgode katar o pachape, ta katar iek kai ikhardola Jesus kai mulo ta kai o Pablo phenel kai akana si llundo.

²⁰ Ta sar me ni llanava so ka cherav ande gala ezgode, puchlem e Pablo dal mangela te llal ando Jerusalem te chinen leke e kris katar gala ezgode.

²¹ A vou mangla te chinel leke e kris o charo, ta phendem te achel phanglo lligo ni ka bichalav le tute.

²² Ondaka o Agripa phenda e Festoke: I me mangav te asunav gole llene. A o Festo phenda leke: Isto thiara ka asune le.

²³ Thiarinako, o Agripa ta o Berenise avile ta die barimaia andre ande soba, ta die lenchar i e gazda e boñikonenge ta e mai asunde llene e foroke. Ta o Festo bichalda te anen lete e Pablo,

²⁴ ondaka o Festo phenda: Charo Agripa, ta sa tumen kai sen chidine amenchar: Etalo kote gua lleno. Sa e judiura avile mande te dosaren le sar cherde le ando Jerusalem ta i kate ande Sesarea, ta samo urkin ta mangen me te phenav te mundaren le.

²⁵ A me sar acharav kai ni cherda niso te mundaren le, ta sar isto vou mangla te chinel leke e kris o charo, goleke me manglem te bichalav le tute.

²⁶ A sar inai man so te pisiv e charoke, anav le tumende, ta mai but tute, charo Agripa, ta gia kana tumen ka puchen le ka llana letar mai but ta gia ka avel man so te pisiv e charoke.

²⁷ Soke avela iek dilipe te bichaldol iekhe phangle ta te na phendol katar so dosaren le.