Рындоря 23 - Biblia ande chib Romani

¹ O Pablo dikhla pe lengi kris ta phenda lenge: Phlalalen, llik kate inai man nisavi dos ande me mislura angla o Del.

² Ondaka o Ananias, kai saia o mai baro popo, phenda e llenenge kai sea pasa o Pablo te chalaven le ande leko mui.

³ A o Pablo phenda leke: ¡O Del ka chalavel tut, kojamnea! Te besea tu kote te chine mange kris prema o zakono, ¿Soke tu phage o zakono ta bichale te chalaven man?

⁴ E llene kai sea kote phende leke: ¿Gia kuse e mai bare popo e Devleko?

⁵ O Pablo phenda lenge: Phlalalen, me ni llanava kai vou si o mai baro popo; soke ando Pisipe phenel: Na kus gole kai gazdaril che foro.

⁶ Mapalal, acharda kai nesave llene katar e kris sea katar e saduseura ta aver sea katar e fariseura, o Pablo dia orba zurale ta phenda: Phlalalen, me sem fariseo, ande mi vicha si fariseura, ta chinen mange kris soke pachau kai e mule ka usten katar o meripe.

⁷ Samo phenda gua o Pablo, e fariseura ta e saduseura die orba maskar pete, ta fuladili e kris.

⁸ Soke e saduseura phenen kai e mule ni usten katar o meripe, ta kai inai suechura ni duura. A e fariseura pachan ande sa gola ezgode.

⁹ Sa urkisarde, ta nesave kovacha e zakonoke kai sea katar e fariseura, ustile ta phende: Gava lleno ni cherda nisavo bilachipe, sai avelpe kai dia lea orba iek duo o iek suecho.

¹⁰ Sar e burkania cherdola ios mai bari, o gazda e boñikonengo darailo soke sai mundarena le, ta bichalda nesave boñikonen te ikanen le kotar ta te inllaren le pale ando cher e boñikonengo.

¹¹ Nakhla iek llive, ta kana peli e riat o Gazda avilo kai o Pablo ta phenda leke: Le chuke zor, soke gia sar dian e orba chachi mandar kate ando Jerusalem, isto gia ka cherele ande Roma.

Denpe orba sar kamundaren e Pablo

¹² Thiarinako nesave judiura diepe orba te mundaren e Pablo, ta jale sovel te achen prokete e Devletar kai ni ka jan ni ka pien lligo ni ka mundaren le.

¹³ Von sea mai but katar e saranda llene kai jale e sovel.

¹⁴ Llele kai e gazda e poponenge ta kai e phure e judionenge, ta phende lenge: Amen jalam sovel te acha prokete e Devletar kai ni ka ja lligo ni ka mundara e Pablo.

¹⁵ Tumen ta ogala llene katar e bari kris mangen katar o gazda e boñikonengo te anel le tumende thiara, ta phenen leke kai mangen te dikhen mai prezomaia laki dos; ta amen ka adurichara te mundara le mai anglal te anen le tumende.

¹⁶ A iek sinoucho e Pabloko llangla so mangena te mundaren le, ta llelo kai o cher e boñikonengo te phenel leke.

¹⁷ O Pablo ikharda iekhe katar e kapitanura, ta phenda leke: Inllar gale terne kai o gazda e boñikonengo, soke si te del leke iek orba.

¹⁸ O kapitan inllarda le kai o gazda e boñikonengo, ta phenda leke: O phanglo o Pablo mangla mandar te anav kate gale terne, kai si te phenel chuke vareso.

¹⁹ O gazda e boñikonengo istarda e terne e vastetar, inllarda le pe iek rig ta puchla le: ¿So mange te phene mange?

²⁰ O terno phenda leke: E judiura diepe orba te mangen tutar te inllare e Pablo thiara kai e llene katar e bari kris, te prezon mai but ande leki dos.

²¹ Te na pacha len, soke mai but katar e saranda llene ka aduricharen le gurudine, ta jale sovel te aven prokete e Devletar kai ni ka jan ni ka pien lligo ni ka mundaren e Pablo; ta akana von aduricharen so ka phene lenge.

²² Ondaka o gazda e boñikonengo phenda e terneke te llaltar, ta phenda leke te na llanel niko goia orba kai dia leke.

Bichalen e Pablo kai o Feliks

²³ O gazda e boñikonengo ikharda pe duie kapitanonen, ta phenda lenge te getosaren dui stotine boñikonen te llan peske, ta eftavardesen te llan pe gra ta dui stotine llene te inllare lanse, te llan ande Sesarea ande inia e riateke.

²⁴ Ta i phenda te lacharen grasten te llal pe lende o Pablo, ta i phenda te inllaren le bi nusdako kai o sudo o Feliks.

²⁵ Ta bichalda lenchar iek lil kai phenela gia:

²⁶ O Klaudio Lisias pisil e glamnoke o gazda e boñikonengo o Feliks: Te ave sasto ta bajtalo.

²⁷ E judiura phanglea gale llene ta mangena te mundaren le, a kana me llanglem kai saia iek lleno rromano, llelem me boñikonenchar ta mukliardem le.

²⁸ Sar mangava te llanav soke dosarena le, inllardem le kai e kris e judionengi,

²⁹ ta llanglem kai dosarena le cheres lengo zakono; a inai saia soke te mundardol, ni te thoven le ande rubie.

³⁰ A sar llanglem kai e judiura mangena te mundaren le, bichalav le tute. Ta manglem katar e llene kai dosaren le te den orba angla tu so si te phenen leke.

³¹ E boñikura cherde so phende lenge te cheren; istarde e Pablo ta inllarde le orachaia ande Antipatris.

³² Thiarinako, e boñikura kai llana peske irisaile kai o cher e boñikonengo a e boñikura kai llana pe gra llele e Pabloia.

³³ Kana avile ande Sesarea, die o lil kai o sudo ta mukle lete i e Pablo.

³⁴ Kana chitisarda o lil, o sudo puchla katar saia vou; ta kana llangla kai saia katar e Silisia,

³⁵ phenda leke: Ka asunav tut kana ka aven gola kai dosaren tut. Mapalal phenda te inllaren le ando cher e Erodeseko ta te prezon le.