Рындоря 22 - Biblia ande chib Romani

¹ Phlalalen ta dadalen, asunen so ka phenav tumenge te chacharav man.

² Kana asunde kai dela orba ebreo, ios mai achile, ta o Pablo phenda lenge:

³ Me sem judio. Biandilem ando Tarso katar e Sisilia, barilem kate ando Jerusalem ta sikada man o Gamaliel, prema o zakono amare puranengo. Ta sa o vreme radisardem e Devleke sa me liea, isto gia sar cheren le sa tumen akana.

⁴ Omanglal me llava te mundarav e llenen kai llana pe gava nevo drom ta phanglem len ande rubie, murusen ta i diskinien.

⁵ A o gazda katar e popura ta sa e phure dikhle so cherdem ta von die man lila te inllarav len kai amare phlal kai si judiura ando Damasko, ta llelem incha te rodau llenen kai pachan ando Jesus te anav len ando Jerusalem ta kate te dukhavav len.

⁶ A kana me llava po drom, ta sema pasa o Damasko, kana saia ande desudui e lliveseke, iek baro villelo katar o miloso klichisarda truial mandar,

⁷ ta pelemtar pe phuv. Ta asundem iek avazi kai phenela mange: Saulo, Saulo, ¿soke rode te mare man?

⁸ A me puchlem: ¿Ko san tu, Gazda? A o avazi phenda mange: Me sem o Jesus katar o Nazaret, isto gua kai tu rode te mare.

⁹ E llene kai llana manchar dikhle o villelo, a ni asunde o avazi gole lleneko kai dela orba manchar.

¹⁰ A me puchlem: ¿So morabi te cherav, Gazda? A o Gazda phenda mange: Uste ta lla pe cho drom karing o Damasko. Kote ka phendol chuke sa so morabi te chere.

¹¹ Ta saia te inllaren man e vastetar ando Damasko soke o villelo muklaia man korro.

¹² Kote saia iek lleno kai ikhardola Ananias, vou pachala ando Del ta kandela but o zakono e Moiseseko; ta sa e judiura kai zivina ando Damasko dena lache orbe letar.

¹³ O Ananias avilo te dikhel man ta phenda mange: Phlala Saulo, akana dik pale. Ondaka isto kote sai dikhlem le.

¹⁴ Mapalal phenda mange: O Del amare dadengo esvirisarda tut te pinllare leki volia, ta te dikhe e Jesuse kai si chacho ta te asune leko avazi.

¹⁵ Soke tu ka de leki orba e chachi angla sa o sueto, ta ka phene so dikhlan ta so asundan.

¹⁶ Ta akana, na adurichar ios. Uste, kristisao ta jalau cho bilachipe ando anav e Gazdako.

¹⁷ Ta kana irisailem ando Jerusalem, llelem te moliv man ando cher e Devleko, ta sikadila mange sargo iek suno.

¹⁸ Dikhlem e Gazda kai phenda mange: Sigar, llatar oma katar o Jerusalem, soke so ka phene mandar von ni ka pachan ta ni ka thoven chuke sama so ka phene lenge mandar.

¹⁹ Me phendem leke: Gazda, von llanen kai me llava ande suako khanlliri e judionengi ta inllarava phangle e llenen kai pachana ande tu; ta llanen kai me marava len,

²⁰ ta kana mundarde che sluga e Estebane, kai dela e chachi orba tutar, me sema kote ta phenava kai si orta te mundaren le, ta i arakhlem e patave golenge kai mundarde le.

²¹ A o Gazda phenda mange: Llatar akana soke ka bichalav tut ande phuvia kai si dur.

O Pablo ande va e sudoke

²² Llik kote asunde leke alava. Ondaka urkisarde: ¡Gua lleno morabi te merel nasti te zivil! ¡Ikanen le katar gava sueto!

²³ Ta sar von mai urkina ta chinosarena pe patave ta chudena o prajo ando miloso,

²⁴ o gazda katar e boñikura phenda te thoven e Pablo ando cher e boñikonengo, ta phenda te maren le e bichoia te sai phenel o chachipe pala so e llene kusena le pe gachin.

²⁵ A kana phangle le te maren le, o Pablo puchla e kapitane kai saia kote: ¿Si tumen o gazdaripe te maren iekhe llene kai si rromano ta te na chinen leke ni iek kris mai anglal?

²⁶ Kana asunda so phenela o Pablo, o kapitan llelo kai o gazda e boñikonengo, ta phenda leke: ¿So ka chere? Gava lleno si rromano.

²⁷ Ondaka o gazda e boñikonengo avilo kai o Pablo, ta puchla le: ¿Si de istina kai san rromano? O Pablo phenda leke: Ea.

²⁸ O gazda e boñikonengo phenda leke: Me diem but love te cherdivav rromano. A o Pablo phenda leke: Me sem rromano sar kana biandilem.

²⁹ E llene kai saia te maren le, kana llangle gala ezgode durile letar; ta isto o gazda e boñikonengo, kana llangla kai saia rromano darailo soke phanglaia le e lanchonenchar.

O Pablo angla e bari kris e judionengi

³⁰ Thiarinako, o gazda e boñikonengo, sar mangela te llanel soke e judiura dosarena e Pablo, ikanda letar e lanchura ta bichalda te chiden e mai bare poponen ta sa e llenen katar e mai bari kris. Mapalal ikanda e Pablo ta thoda le angla lende.