Рындоря 2 - Biblia ande chib Romani

O Santo Duo avel

¹ Kana avile e llivesa katar o Pentekostes, sa e llene kai pachana ando Jesus chidinailea pe iek than.

² Ondaka kana ni uzdinape, katar o miloso basla but zurale sargo iek bari balav kai pherda sa o cher kote kai von sea besindo.

³ Ta dikhile chibia sargo iaga kai fuladile, ta upral pe suako lleno achili iek.

⁴ Ta sa pherdile katar o Santo Duo, ta thode te den orba ande aver chibia, prema sar dela len o Santo Duo te den orba.

⁵ Ando Jerusalem zivina judiura kai volina e Devle, ta kai avilea katar suako rig e suetoki.

⁶ E llene chidinaile kana asunde kai basloia vareso, ta ni llanena so te mislin, soke e llene kai pachana ando Jesus dena orba, a suako lleno asunela e llenen isto ande piri chib.

⁷ Gia baro saia lengo chudo, kai phenena: ¿Inai galileura gala llene kai den orba?

⁸ ¿A sar amen asuna lengi orba ande amare chibia?

⁹ Kate si llene katar e Partia, katar e Media, katar o Elam, katar e Mesopotamia, katar e Judea, katar e Kapadosia, katar o Pontio ta katar e Asia,

¹⁰ katar e Frijia ta katar e Panfilia, katar o Ejipto ta katar e Libia kai si pasa o Sirene. Si i llene rromanura kai zivin kate.

¹¹ Nesave lendar si katar e vicha e judionengi a aver mangle te cherdon judiura. Ta si nesave kai avile katar e Kreta ta katar e Arabia. ¡Ta asuna len kai dena orba isto ande amari chib katar e bare ezgode e Devleke!

¹² Sa e llenenge saia chudo ta ni llanena so te mislin, ta phenena iek avereke: ¿So si sa gava?

¹³ A nesave llene marena espurnia ta phenena: ¡Gua si soke sa gola llene si mate!

O Pedro del orba e llenenge

¹⁴ Ondaka o Pedro ustilo ta i ogola apostolura, ta dia orba zurale ta phenda: Judionalen, ta sa e llene kai zivin ando Jerusalem. Mangav te asunen ta te thoven sama so ka phenav tumenge.

¹⁵ Gala llene inai mate sar tumen mislin, soke iakom si ande inia e thiarinake.

¹⁶ So llalpe kate si so phenda o profeta o Joel, kana phenda:

¹⁷ Ande llivesa kai si te aven mai angle kana ni ka achel but vreme, o Del phenel, ka dav mo Duo sa e sueto. Tumare chaurre ta tumare chorra ka phenen murne porouke, tumare chave ka dikhen so si te avelpe, a e phure ka dikhen sune.

¹⁸ Ta i pe me sluge, murus ta diskinie ka dav mo Duo ande gola llivesa, ta ka phenen pofesie ande mo anav.

¹⁹ Ta ando miloso ta pe phuv ka sikavav bare ezgode, rat, iag ta oblakura thuveke.

²⁰ O kham ka cherdol truniariko, ta o chon ka cherdol sargo rat, mai anglal te avel o llive e Gazdako, llive baro ta blagosime.

²¹ A sa gola kai mangen katar o Gazda, ka aven braduime.

²² Asunen akana israelitura so ka phenav: Tumen llanen kai o Del sikada angla tumende o gazdaripe e Jesuseko katar o Nazaret, letar cherda te cherel bare ezgode Devlikane.

²³ Ta ande Devleki volia saia te avel dino, goleke tumen dien le kai e llene bilache te mundaren le.

²⁴ A o Del cherda le te ustel katar o meripe, ta lia letar e duk e merimaki, soke o meripe nasti gazdarila pe lete.

²⁵ O charo o David kana dia orba katar o Jesus phenda: Me suako lleve dikhava e Gazda anglal mande. Lea pe mi chachi niso ni ka cherel man te perav.

²⁶ Goleke mo lio veselilpe, ta llilabau veselimatar. Goleke inai man briga,

²⁷ soke ni ka muke man ando limori ta ni ka muke te murilpe e esnaga katar cho santo sluga.

²⁸ Sikadan mange o drom e zivotoko ta ka phere man veselia kana ka ave pasa ma.

²⁹ Phlalalen, ka phenav tumenge chachimaia kai o David mulo ta prajosarde le, ta leko limori si maskar amende llik allive.

³⁰ A o David saia profeta, ta llanela kai o Del dia le po alav sovlienchar kai ka cherel te avel charo iekhe llene katar leko porodo.

³¹ Ta sar dikhla kai o Mesias mai angle saia te ustel katar o meripe, dia orba cheres gaia ezgoda ta phenda kai o Mesias ni ka achel ando limori ta kai ni leki esnaga ni ka murilpe.

³² O Del cherda te ustel katar o meripe isto gole Jesuse, ta sa amen phena kai gua si o chachipe soke amen sama kote.

³³ Ta o Del blagosisarda le ta thoda le pe pi chachi rig ta lia katar o Dad o Santo Duo kai diaia po alav kai ka del, ta mapalal vou diale amenge. Gua si so tumen dikhlen ta asunden.

³⁴ Soke o David ni llelo ando miloso, soke isto vou phenda: O Gazda phenda me Gazdake: Bes pe mi chachi,

³⁵ lligo ni ka thovav che dusmanonen telal tala che porrne.

³⁶ Te llanel sa o foro katar o Israel kai chachimaia isto gava Jesus kai tumen krustosarden, o Del cherda le Gazda ta Mesias.

³⁷ Kana asunde gua e llene kai sea chidine, avila lenge but zalba, ta puchle e Pedro ta ogole apostolen: Phlalalen, ¿So morabi te chera?

³⁸ O Pedro phenda lenge: Irin tumen kai o Del ta te kristin tumen suako lleno ande Jesukristoko anav, te sai o Del prostil tumaro bilachipe, ta gia vou ka del tumen o Santo Duo.

³⁹ Soke dia po alav tumenge ta tumare chaurrenge, ta i sa golenge kai si dur, ta suakone lleneke kai o Gazda amaro Del mangela te ikharel.

⁴⁰ Ta bute alavenchar ios o Pedro phenela lenge so te cheren, ta phenela: ¡Durion katar gala llene bilache!

⁴¹ Ta gola llene kai thode leke sama avile kristime. Ta ande gua llive avile thode maskar e llene kai pachan preko trin milie llene.

⁴² Ta cherena chachimaia so sikadea len e apostolura, fulavena so saia len maskar pete, chidiniaona te phagen o marrno, ta molinape.

O zivoto katar e purve kristianura

⁴³ Sa chudinape katar e bare ezgode Devlikane kai cherela o Del te cheren e apostolura.

⁴⁴ Sa e llene kai pachan sea ande iek than ta fulavena so saia len maskar pete,

⁴⁵ ta bichinena pe ezgode ta sa so saia len, ta fulavena e love prema so trubula suako llene.

⁴⁶ Ta i suako llive chidiniaona ando cher e Devleko, ta ande chera phagena o marrno ta jana saurre ande iek than veselimaia ta iekhe liea prosto.

⁴⁷ Blagosina e Devle ta sa e llene volina len. Ta suako llive o Gazda cherela te aven mai but llene te pachan ta te aven lenchar.