Рындоря 19 - Biblia ande chib Romani

O Pablo ando Efeso

¹ Kana o Apolo saia ando Korinto, o Pablo nakhlo katar e burdura ta avilo ando Efeso, kote malada nesave llenen kai pachana ando Jesus.

² Puchla len: ¿Tumen lien o Santo Duo kana pachaien? Von phende leke: Amen ni asundam katar o Santo Duo.

³ O Pablo puchla len: A ¿savo kristope lien tumen? Von phende: O kristope e Juaneko.

⁴ O Pablo phenda lenge: Ea, o Juan kristila e llenen kai irinape karing o Del, ta phenela lenge te pachan ande gua kai saia te avel, a gua kai saia te avel si o Jesus.

⁵ Kana von asunde gala orbe, kristisaile ando anav e Gazdako o Jesus;

⁶ ta kana o Pablo thoda pe va pe lengo soro, avilo upral pe lende o Santo Duo, ta dena orba ande chibia kai inai pinllarde ta phenena porouke e Devleke.

⁷ Von sea preko desudui murusa.

⁸ Trin chon o Pablo llelo ande khanlliri e judionengi ta phenela lenge e orba katar e charoina e Devleki ta mangela te cherel e llenen te pachan ando Jesus.

⁹ A nesave judiura thodepe besne ta ni kamle te pachan, ta angla e llene die orbe bilache katar e llene kai pachana ando Jesus. Ondaka o Pablo durilo lendar ta inllarda e llenen kai pachana ando Jesus kai iek cher sikadimako kai saia iekhe lleneko kai ikhardola Tirano. Kote dela orba suako llive,

¹⁰ ta dui burs cherda gia, ta sa e llene kai zivina ande Asia, judiura ta i gola kai inai sea judiura, asunde e orba e Gazdaki.

¹¹ Ta o Del cherela e Pablo te cherel bare ezgode Devlikane

¹² gachin, kai e dikhle o e patave kai dodisarena leki esnaga, inllarena len kai e nasuale, ta sastona katar po nasualipe, ta e duura bilache likena lendar.

¹³ A nesave judiura kai llana pe droma ta tradena e llenendar e duura bilache, mangle te cheren le ando anav e Jesuseko; ta phenena e duonenge: ¡Ando anav katar o Jesus, gua kai o Pablo del orba letar, phenav tumenge te liken!

¹⁴ Gava si so cherena e efta chave iekhe judioke kai ikhardola Eseva kai saia iek gazda katar e popura.

¹⁵ A iek drom o duo bilacho phenda lenge: Pinllarav e Jesuse, ta llanav ko si o Pablo; a tumen, ¿ko sen?

¹⁶ Ondaka kote, o lleno kai saia ande le o duo bilacho chudiape pe lende ta bare zoriaia marda saurren, gia zurale marda len kai nasle katar o cher bi patavengo ta chaladine.

¹⁷ Ta sa e llene kai zivina ando Efeso, judiura ta i gola kai inai sea judiura, llangle so nakhlaia ta daraile but. Ta gia cherdola mai pinllardo o anav e Jesuseko.

¹⁸ Ta i but llene kai pachaie avena ta phenena angla e llene sa o bilachipe kai cherdea omanglal,

¹⁹ Ta but llene kai sea chirimatarke ande lila kai von chitina ta phabarde len angla sa e llene, ta kana llinde so mola gola lila, llangle kai mola len preko pinda milie tolaria rupune.

²⁰ Gia e orba e Gazdaki asundola sa mai but ta sikadola e zor kai saia la.

²¹ Kana nakhle gala ezgode, o Pablo mangla te llal ande Masedonia ta ande Akaia ta te resel llik ando Jerusalem. Ta phenela kai katar o Jerusalem mapalal saia te llal i ande Roma.

²² Ondaka bichalda ande Masedonia duie llenen kai pomozina le, e Timoteo ta e Erasto, a vou achilo nesave llivesa ios ande Asia.

Burkania ando Efeso

²³ Ande gola llivesa avilape iek bari burkania ando Efeso cheres o nevo drom,

²⁴ gaia burkania cherdala iek lleno kai ikhardola Demetrio, kai radila ando rup. Gava lleno cherela e rupea chera minone kai sea katar e deli e Artemisa, ta von lena but love ande gava rado.

²⁵ O Demetrio chidia e llenen kai radina lea ta i avere llenen kai radina sargo vou, ta phenda lenge: Manusalen, tumen llanen kai gale radoia amen la love te zivi.

²⁶ A sar tumen dikhen ta asunen, gua o Pablo phenel kai e dela kai cheren e llene inai dela. Ta cherde te pachan but llene, na samo kate, ando Efeso ta i ande sa e Asia.

²⁷ Ta bari dar si, soke sai murilpe amaro rado, ta i sai bristarenpe katar o cher katar amari deli Artemisa, ta gia niko ni ka thovel lake sama soke llik kate blagosin la ande sa e phuv katar e Asia ta sa o sueto.

²⁸ Kana asunde gaia orba jolaile but ta urkisarde: ¡Blagosime te avel e Artemisa katar e efesiura!

²⁹ Sa o foro ni llanela so ka cherel ta jutle po Gaio ta po Aristarko, von sea dui llene katar e Masedonia kai llana e Pabloia, ta terrisarde len llik kai o teatro.

³⁰ A o Pablo mangela te del kote te del orba e llenenchar, a e llene kai pachana ando Jesus ni mukle le.

³¹ Ta i maskar e sudura katar e Asia sea nesave amala e Pabloke, kai bichalde te phenen leke te na del kote.

³² A kote kai sea chidine, nesave urkina iek ezgoda a aver llene urkina aver ezgoda, soke saia burkania ta aver llene ni llanena soke sea chidine kote.

³³ A nesave llene lendar phende e Alejandroke savi orba llalape kote, a e judiura espidiea le angla sa e llene. Ondaka o Alejandro phenda lenge e vastenchar te achen te sai chacharel e judionen angla o foro.

³⁴ A kana llangle kai i o Alejandro saia judio, sa urkisarde preko dui saiata: ¡Blagosime te avel Artemisa deli katar e efesiura!

³⁵ Ondaka o sudo e foroko, kana achada e llenen, phenda: Manusalen katar o Efeso, sa o sueto llanel kai o rado gale foroko si te arakhel o cher katar e bari deli Artemisa kai laki esnaga sargo barreki fulisti katar o miloso.

³⁶ Sar niko nasti phenel kai gua si kojaipe, achen esmiro ta mislin tumen so ka cheren.

³⁷ Soke gala llenen kai tumen anden ni cherde niso bilacho e chereke katar amari deli ta ni die orba bilachi latar.

³⁸ Te mangela te dosarel vareka o Demetrio o e llene kai pomozin le, kote si e krisaria ta e chera e krisenge te den orba angla e sudura ta suako lleno te del orba pala po chachipe.

³⁹ A te mangena te den varesavi aver orba, ka cherdol iek kris chachuni.

⁴⁰ Gale ezgodaia kai nakhla allive sai thoven pe amende e dos kai divosara e llenen, soke te puchle soke si divome e llene inai amen ni iek orba te chachara amen.

⁴¹ Ta kana phenda gala orbe, mangla e llenendar te llantar.