Рындоря 17 - Biblia ande chib Romani

Burkania ande Tesalonika

¹ O Pablo ta o Silas, nakhle e dromea katar e Anfipolis ta katar e Apolonia, ta mapalal avile ande Tesalonika, kote e judiura saia len iek khanlliri.

² O Pablo sar saia sikado, llelo ande khanlliri e judionengi, ta bis ta iek llive suako sabado, dia orba lenchar prema o Pisipe.

³ Phenela lenge kai o Mesias saia te merel, ta te ustel katar o meripe. Ta phenela lenge: Isto gava Jesus kai me phenav tumenge, si o Mesias.

⁴ Nesave judiura pachaie, ta phirde e Pabloia ta e Silasea. Ta i pachaie but griegura kai blagosina e Devle ta but diskinie pristane.

⁵ A gua cherda te joliaon e judiura kai ni pachana, ta chidie iekhe bilache llenen kai ni saia len so te cheren te burkanin e foro. Ta i llele kai o cher e Jasoneko te kusen, soke rodena e Pablo ta e Silase te ikanen len andral te den len kai e llene:

⁶ A sar ni malade len kote, inllarde e Jasone terrindo ta i nesave avere phalen kai e sudura e foroke ta urkina: ¡Gala llene kai diliarde sa e sueto, avile i kate,

⁷ ta o Jason mukla len ande po cher! ¡Sa gala llene phagen e zakonura e charoke, soke phenen kai si aver charo kai si o Jesus!

⁸ O foro ta e sudura izdraie kana asunde so phenela.

⁹ A o Jason ta ogola pochinde ta mukle len.

Delpe e orba ande Berea

¹⁰ Kana peli e riat, e phlal cherde te llantar o Pablo ta o Silas karing e Berea. Kana avile llele karing e khanlliri e judionengi.

¹¹ Gala judiura sea mai lache neko ogola katar e Tesalonika, kote avila lenge drago e poroka ta suako llive chitina o Pisipe te dikhen dal saia chachipe so phenena lenge.

¹² But llene lendar pachaie, ta pachaie i but llene katar e griegura, e diskinie pristane ta i e murusa.

¹³ A kana e judiura katar e Tesalonika llangle kai o Pablo phenela e poroka e Devleki i ande Berea, llele incha ta cherde te divon e llenen.

¹⁴ A e phlal cherde te llaltar oma o Pablo karing e mora, a o Silas ta o Timoteo achile ande Berea.

¹⁵ E llene kai llana e Pabloia avile lea llik ande Atenas. Mapalal irisaile te phenen e Silaseke ta e Timoteoke te chidiniaon lea oma.

O Pablo ande Atenas

¹⁶ Kana o Pablo adurichare la e Silase ta e Timoteo ande Atenas, avila leke zalba soke dikhla kai o foro saia pherdo dela.

¹⁷ Goleke denape orba ande khanllira e judionenchar ta i avere llenenchar kai blagosina e Devle, ta suako llive denape orba po maskaral e foroko e llenenchar kai chidiniaona kote.

¹⁸ Ta i nesave filosofura epikureura ta estoikura die lea orba. Nesave phenena: ¿Katar so del orba gava lleno kai si pherdo orbe? A aver phenena: Acharav kai gava lleno inllarel e viasta katar e dela avere phuvienge. Von phenena gua soke o Pablo dela lenge orba katar e lachi viasta e Jesukristoki ta sar ka ustelpe katar o meripe.

¹⁹ Ondaka inllarde le kai o Aeropago ta puchle le: ¿Sai phene amenge savo nevo sikadipe si gava kai ane amenge?

²⁰ Soke tu de amenge orbe kai niko ni pinllarel ta manga te llana so si.

²¹ Von phende gua soke sa e ateniensura ta i gola kai sea avrial ta zivina kote, lengi briga saia te asunen ta te den orba katar suako nevi viasta.

²² A o Pablo ustilo po maskaral lendar ando Aeropago, ta phenda: Ateniensura, prema sa so dikhav, si tumen but pachape.

²³ Soke kana dikhav e thana kai blagosin tumare delen, maladem iek than kai blagosin ta pe lete si pisime: Iekhe Devleke kai inai pinllardo. Gole Devle kai tumen blagosin ta ni pinllaren, katar gua Del me avilem te dav tumenge orba.

²⁴ O Del kai cherda e phuv ta sa so si pe late, si Gazda e milosoko ta e phuviako. Ni zivil ande templura cherde e manusetar,

²⁵ ta ni trubul le te cherel niko niso pala le, soke vou dia amen o zivoto, e balav ta sa ogola ezgode.

²⁶ Katar samo iek manus cherda sa e manusen te zivin ande sa e phuv; ta sikada lenge o vreme ta o than kote kai si te zivin,

²⁷ te roden e Devle, sargo pipindo, ta te malaven le, a o chachipe si kai o Del inai dur katar ni iek amendar.

²⁸ Soke ando Del amen zivi misko amen ta sam; sar phende tumare llene kai pisin sukar: Katar leki vicha sam.

²⁹ A soke sam katar leke vicha, morabi te na misli amen kai o Del si sargo gola dela sunakune rupune o barrustune, kai e llene cheren prema lengo mislo.

³⁰ Bute bursenchar o Del prostisarda e llenenge kai cherena gala ezgode soke ni llanena so cheren, a akana phenel saurrenge pe suako rig te irinpe lete.

³¹ Soke o Del chinada iek llive kai ka krisil e sueto e chachimaia iekhe llenea kai vou esvirisarda, ta gua sikada saurrenge kana cherda le te ustel katar o meripe.

³² Kana asunde kai e mule usten katar o meripe, nesave llene marde espurnia, a aver llene phende: Pale asundama tutar goia orba omanglal.

³³ Ondaka o Pablo llelotar kotar.

³⁴ A nesave llene llele pala le ta pachaie. Maskar lende saia o Dionisio, vou saia iek lleno katar o Aeropago, ta kote saia i iek diskinia kai ikhardola Damaris, ta aver diskinie.