Рындоря 14 - Biblia ande chib Romani

Phendol e orba e ando Ikonio

¹ Ando Ikonio o Pablo ta o Bernabe die ande khanlliri e judionengi ta kote die orba katar o Jesus, ta but llene kai sea judiura pachaie ando Jesus ta i gola kai inai sea judiura.

² A e judiura kai ni pachana ando Jesus cherde te joliaon pe phlal e llene kai inai sea judiura.

³ A e apostolura achile kote but vreme, thode pi vera ando Del ta die orba sa pe chachimaia. Ta o Del chacharda so von phenena katar e Devleko volipe, ta dela len zor te cheren bare ezgode Devlikane.

⁴ A e llene katar o foro sea fulade, nesave llene sea pe rig e judionengi ta aver pe rig e apostolengi.

⁵ Ondaka e judiura ta i gola kai inai sea judiura achile pe iek orba e sudonenchar te maren len ta te mundaren len e barrenchar.

⁶ A o Pablo ta o Bernabe, kana llangle so mangena te cheren lenchar, nasle ande Listra ta ando Derbe, forura katar e Likaonia ta ande sogo si e forura kai si truial,

⁷ ta i kote phende e lachi viasta.

Ande Listra chalade e barrenchar e Pablo

⁸ Ande Listra saia iek lleno kai nasti phirela soke biandiloia bango,

⁹ ta gava lleno asunela so phenela o Pablo, a o Pablo dikhla kai saia le pachape te avel sasto.

¹⁰ Ondaka o Pablo dia lea orba zurale ta phenda leke: ¡Uste ta phir! Gua lleno jutlo ta thodape pe porrne ta phirda.

¹¹ Kana dikhle so cherda o Pablo, urkisarde ande chib kai den orba ande Likaonia ta phenena: ¡Dela sargo manusa fuliste amende!

¹² Ta mislina kai o Bernabe saia o del Zeus ta kai o Pablo saia o del Ermes soke vou saia kai dela orba.

¹³ O popo katar o del Zeus kai saia leki khanlliri angla o foro, anda guruven ta lulunlla lacharde. Vou ta e llene mangena te cheren lenge iek kurbano.

¹⁴ A kana o Bernabe ta o Pablo acharde so mangena te cheren, pharrade pe patave ta thodepe maskar e llene ta urkisarde:

¹⁵ Manusalen, ¿soke cheren gua? Amen sam manusa, sargo tumen. Amen avilam te phena tumenge e lachi viasta te sai muken gala ezgode kai ni mol len niso, ta te irin tumen kai o Del o llundo kai cherda o miloso e phuv e mora ta sa so si ande lende.

¹⁶ Cherel but burs palpale o Del mukla te llal suako lleno pe po drom,

¹⁷ sa o vreme sikada ko saia vou e lachimaia kai cherela, soke vou si gua kai bichalel tumenge o bursin ta o sukaripe kai del e phuv; ta vou del saurren so trubul len o jape ta te aven vesele.

¹⁸ A sa pe orbenchar o Bernabe ta o Pablo nasti achade len te cheren lenge kurbano.

¹⁹ Ondaka avile nesave judiura katar e Antiokia ta katar o Ikonio, ta cherde e llenen te bolden po mislo; ta e llene kai mangena te cheren lenge kurbano chalade e Pablo e barrenchar ta sar mislina kai mundarde le, terrisarde le avri katar o foro.

²⁰ A kana e llene kai pachana ando Jesus chidinaile truial katar o Pablo, vou ustilo ta pale dia ando foro ta thiarinako llelo e Bernabesea karing o Derbe.

²¹ Kana phende e lachi viasta ando Derbe, but llene pachaie ando Jesus, a von irisaile ande Listra ando Ikonio ta ande Antiokia.

²² Ande gola forura die zor e llenen kai pachana ando Jesus, ta phende lenge te na muken po pachape, ta phende lenge kai morabi te nakha but bari patnia mai anglal te da ande charoina e Devleki.

²³ Ande suako khanlliri o Pablo ta o Bernabe thovena phuren te pomozin e llenen kai pachaie ando Jesus, ta kana molisaile ta allunisarde, mukle len ande va e Gazdake golen kai pachaie ande le.

O Pablo ta o Bernabe irinpe katar e Siria ande Antiokia

²⁴ O Pablo ta o Bernabe nakhle katar e Pisidia, ta avile ande Panfilia.

²⁵ Ta ando Perjes phende e lachi viasta ta mapalal llele ande Atalia.

²⁶ Kote likiste ande iek llimia ta llele karing e Antiokia. Ande gua foro e llene katar e khanlliri manglea e Devletar volimaia te arakhel e Pablo ta e Bernabee kana von ka thovenpe te phenen e lachi viasta.

²⁷ Kana avile ande Antiokia, chidie e llenen katar e khanlliri ta phende lenge sa so cherda o Del lenchar, ta sar o Gazda putarda o udar e llenenge kai inai sea judiura te sai pachan i von.

²⁸ Ta o Pablo ta o Bernabe achile kote but vreme e llenenchar kai pachana ando Jesus.