Рындоря 10 - Biblia ande chib Romani

O Pedro bichalel te ikharen e Kornelio

¹ Saia iek lleno ande Sesarea kai ikhardola Kornelio, vou gazdarila pe stotina boñikura kai ikhardona italiano.

² O Kornelio ta leki familia pachana ando Del. Ta dela but love te pomozil e judionen ta molilape but e Devleke.

³ Iek llive, kana saia ande trin e lliveseke, sikadila leke ande iek sargo suno: Ta dikhla bristomaia kai iek suecho e Devleko dela kote kai saia vou ta phenela leke: ¡Kornelio!

⁴ O Kornelio dikhla po suecho, ta daraia puchla le: ¿So mange, Gazda? O suecho phenda leke: O Del llanel kai moli tut ta llanel so chere pala e llene kai si chorre.

⁵ Bichal vareka ando Jope te ane iekhe llene kai ikhardol Simono, kai ikharen le Pedro.

⁶ Vou si ando cher katar aver Simono, iek lleno kai radil ande morcha ta zivil pasa e mora.

⁷ Kana llelotar o suecho kai dia lea orba, o Kornelio ikharda katar pire duie llenen ta i iekhe boñiko kai volila but e Devle ta kai o Kornelio uzdilape but ande lete,

⁸ Ta phenda lenge sa so avilape ta bichalda len ando Jope.

⁹ Thiarinako, ande desudui, kana llana karing o Jope, o Pedro likisto te molilpe upral po cher.

¹⁰ Vou saia bokhalo ta mangela te jal, a kana cherena leke te jal, sikadila leke sargo ande iek suno:

¹¹ Ta dikhla kai phutaola o miloso ta fuliela pe phuv sargo iek baro chiti istardo katar e star riga.

¹² Ando chiti sea but zivirinie kai si len star porrne, ta i sapa ta chiriklia.

¹³ Ta asunda iek avazi, kai phenda leke: Uste, Pedro, mundar ta ja.

¹⁴ O Pedro phenda: Na iok, Gazda, me nikada ni jalem niso melalo.

¹⁵ O avazi pale asundilo, ta phenda: So o Del chistosarda, na phen tu kai si melalo.

¹⁶ Trin droma avilape gava, ta o chiti pale llelotar upre ando miloso.

¹⁷ O Pedro achilo brigime soke mislilape so mangela te phenel gua so sikadiloa leke. A e llene kai bichalda o Kornelio puchle kai si o cher e Simonoko, ta avile pasa o udar.

¹⁸ Kana avile, urkisarde ta puchle dal zivila kote iek lleno kai ikhardol Simono, gole kai ikharen Pedro.

¹⁹ Ta kana o Pedro mislilape ande so dikhla, o Santo Duo phenda leke: Dik; trin llene roden tut.

²⁰ Uste, fulie ta lla lenchar ta na dara, soke me bichaldem len.

²¹ O Pedro fulisto ta phenda gole llenenge: Me sem gole kai tumen roden; ¿soke avilen?

²² Von phende: Bichalda amen o Kornelio kai si gazda e boñikonengo, iek lleno chacho kai blagosil e Devle ta sa e judiura volin le. Iek suecho e Devleko phenda leke te ikharel tut, te lla kai leko cher ta te asunel so ka phene leke.

²³ Ondaka o Pedro phenda lenge te nakhen, ta goia riat racharde lete. Thiarinako, o Pedro llelotar lenchar, ta llele lea nesave phlal kai zivina ando Jope.

²⁴ Nakhlo aver llive ta avile ande Sesarea. Kote o Kornelio adurichare la le nesave llenenchar kai sea katar leki familia ta i leke mai lache amale avile lea, soke vou ikhardaia len.

²⁵ Kana o Pedro avilo kai o cher, o Kornelio likisto angla le, ta dia changa te blagosil le.

²⁶ A o Pedro vazdia le ta phenda leke: Thou tut pe porrne, soke i me sem iek manus, sargo tu.

²⁷ Vou dela lea orba, ta dia ando cher ta malada bute llenen chidine.

²⁸ A o Pedro phenda lenge: Tumen llanen kai o zakono katar iek judio ni mukel le te cherel ni iek buchi e llenenchar kai inai judiura o te del ande lenge chera. A o Del sikada mange te na phenav nikake kai si melalo.

²⁹ Goleke samo kana phende mange, ni puchlem niso ta avilem. Akana mangav te llanav ¿soke ikharden man?

³⁰ Ondaka o Kornelio phenda: Cherel star llive, me sema chere ta molivaman ta avilo mande iek lleno kai leke patave klichina.

³¹ Ta phenda mange: Kornelio, o Del asunda cho molipe ta diape golli kai pomozisardan e llenen kai si chorre.

³² Bichal vareka ando Jope te ane iekhe llene kai ikhardol Simono, kai ikharenale Pedro. Vou zivil kai aver lleno kai ikhardol Simono, iek lleno kai radil ande morcha ta zivil pasa e mora.

³³ Ta bichaldem te ikharen tut oma ta tu but sukar cherdan kai avilan. Akana sam sa chidine kate angla o Del, ta manga te asuna sa so bichalda o Gazda te phene amenge.

O Pedro del orba ando cher katar o Kornelio

³⁴ Ondaka o Pedro phenda: Akana llanav chachimaia kai e Devleke saurre sam sargo iek,

³⁵ soke o Del volil e llenen katar suako phuv golen kai kanden le ta cheren o lachipe.

³⁶ O Del dia orba e llenenge kai si katar e vicha e Israeleki, ta phenda lenge e lachi viasta katar e pas; bichaldi e Jesukristotar kai si o Gazda saurrengo.

³⁷ Tumen llanen so avilape ande sa e phuv e judionengi, katar o purvo drom ande Galilea angle, kana o Juan phenda kai trubula te len o kristope.

³⁸ Ta llanen kai o Del dia e Jesuse katar o Nazaret e zor katar o Santo Duo, ta kai o Jesus cherda o lachipe ta sastarda sa e llenen kai nakhena patnia cheres o llavolo. Ta o Jesus sastarda sa gale llenen soke o Del saia lea,

³⁹ ta amen dikhlam sa so cherda o Jesus ande Judea ta ando Jerusalem. Ta mapalal mundarde le pe iek krusto.

⁴⁰ A o Del pala e trin llive cherda le te ustel katar o meripe, ta cherda te sikadol amenge.

⁴¹ Ni sikadilo sa e foroke, vou sikadilo amenge, soke o Del esvirisarda amen mai anglal, te dikha sa so cherda. Ta amen jalam ta pilam lea kana ustilo katar o meripe.

⁴² Ta vou bichalda amen te phena e foroke kai o Del cherda le krisari te chinel kris e llundenge ta i golenge kai mule.

⁴³ Sa e poraukura die orba katar o Jesus, ta phende kai gola kai pachan ande le ka len letar o prostipe katar o bilachipe.

E llene kai inai judiura len o Santo Duo

⁴⁴ O Pedro dela orba, kana o Santo Duo avilo pe sa e llene kai asunena leki orba.

⁴⁵ Ta e llene kai pachana kai sea judiura ta avilea e Pedroia, chudisaile soke o Santo Duo saia dino i e llenenge kai inai sea judiura,

⁴⁶ ta asunena len kai dena orba ta blagosina e Devle ande aver chibia kai inai pinllarde.

⁴⁷ Ondaka o Pedro phenda: ¿A so, sai phenen gale llenenge te na kristinpe kana von lie o Santo Duo sargo amen?

⁴⁸ Ta phenda te aven kristime ando anav e Jesukristoko. Mapalal mangle katar o Pedro te achel lenchar nesave llivesa.