Рындоря 1 - Biblia ande chib Romani

O Jesus phenel kai ka avel o Santo Duo

¹ Ande mo purvo lil, glamno Teofilo, pisisardem katar sa so cherda ta sa so sikada o Jesus sar kana lia te cherel pi buchi

² llik kai o llive kana llelo ando miloso. Ta mai anglal te llaltar, o Santo Duo cherda te phenel so saia te cheren e apostolura kai vou esvirisardaia.

³ Ta kana o Jesus ustilo katar o meripe sikadilo lenge, ta gia dikhle kai chachimaia saia llundo. Ta saranda llive sikadilo lenge ta dela lenge orba katar e charoina e Devleki.

⁴ Ta kana saia e apostolenchar, o Jesus phenda lenge: Na llantar katar o Jerusalem. Mai sukar aduricharen te cherdol o alav kai mo Dad dia tumen ta kai me phendemle tumenge.

⁵ Chachimaia o Juan kristisarda e paiea, a nesave llivesa mai angle, tumen ka aven kristime e Santone Duoia.

O Jesus llaltar upre ando miloso

⁶ E llene kai sea chidine e Jesusea puchle le: Gazda, ¿Ka lachare ande gava vreme e charoina katar o Israel?

⁷ O Jesus phenda lenge: Inai tumenge te llanen o llive ni o vreme kai o Dad thoda ande po gazdaripe.

⁸ A kana o Santo Duo ka avel upral pe tumende, ka len zor ta ka llan te den mi orba ando Jerusalem, ande sa o Juda ta e Samaria, ta pe thana kai si mai dur pe phuv.

⁹ Ta kana phenda gala alava, von dikhle sar vazdinailo ando miloso ta iek oblako ucharda le ta ni dikhle le pale.

¹⁰ Ta kana dikhena ando miloso sar o Jesus duriola, dui llene furiade ando parnipe avile pasa lende

¹¹ ta phende lenge: Galileura, ¿soke dikhen upre? Isto gava Jesus kai saia maskar tumende ta inllardilo ando miloso, ka avel pale isto gia sar dikhlen le kai llaltar.

Thoven e Matiase po than e Judaseko

¹² E apostolura irisaile katar o burdo e Maslinkengo ando Jerusalem. Ni phirde but, phirde so mukel len o zakono te phiren ando sabado.

¹³ Kana avile ando foro, llele ande soba kai chinadea upral po cher. Von sea o Pedro, o Juan, o Santiago, o Andres, o Felipe, o Tomas, o Bartolome, o Mateo, o Santiago chavo e Alfeoko, o Simono o Selote, ta o Judas chavo e Santiagoko.

¹⁴ Sa von chidiniaona suako drom te molinpe nesave diskinienchar, e Mariaia e dei e Jesuseki, ta leke phlalenchar.

¹⁵ Ande gola llivesa o Pedro dia orba e phlalenchar kai sea chidine. Von sea preko stotina ta bis llene, ta phenda lenge:

¹⁶ Phlalalen, saia te cherdol so si pisime, kana o Santo Duo dia orba katar o mui e Davideko kana phenda katar o Judas, gua kai inllarda gole llenen kai phangle e Jesuse.

¹⁷ Soke o Judas saia iek amarendar, ta radila amenchar.

¹⁸ A llelo ta chinda iek umal e lovenchar kai die le pala leko bilachipe kai cherda. Mapalal pelotar e sorea ta pharrlo, ta likiste sa leke porra.

¹⁹ Kana llangle gua e llene kai zivina ando Jerusalem, thode o anav gole umaliako Aseldama, kai ande lengi chib si: O than e rateko.

²⁰ Soke ando lil katar e Salmura phenel: Te achel pusto leko cher, ta te na zivil niko andre. Ta i phenel: Te lel leko rado aver lleno.

²¹ Si llene kate kai sea amenchar sa o vreme kana o Gazda o Jesus saia maskar amende,

²² sar kana kristisarda le o Juan llik kana llelotar ando miloso. Goleke, iek lendar trubul te avel amenchar ta te phenel kai o Jesus ustilo katar o meripe.

²³ Ondaka phende te aven dui: O Jose, kai phenena leke Barsabas ta i phenena leke Chacho, ta o Matias.

²⁴ Ta molisaile gia: Gazda, tu kai pinllare sa amare lie, phen amenge save katar gala dui esvirisardan

²⁵ te lel o rado kai o apostol o Judas jasarda pala po bilachipe, kana llelotar kai o than kai saia prema le.

²⁶ Ondaka cheldepe te dikhen ko ka achel, ta achilo o Matias, kotar angle llinde le e desuiekhe apostolenchar.