Руфь 4 - Biblia ande chib Romani

O Booz ta e Rut Zininpe

¹ Mapalal o Booz llelo te besel kai o udar e foroko, kote chidiniaona e llene. Ondaka nakhela kotar o lleno kai o Booz phenela kai si katar e familia. O Booz phenda: Bre, aide kate ta bes. Gua lleno avilo ta beslo.

² Ondaka o Booz ikharda dese phuren katar o foro, ta mangla i lendar te besen pasa le. Ta kana besle,

³ o Booz phenda gia gole lleneke kai saia katar e familia: E Noemi irisaili katar o Moab, ta mangel te bichinel e umal kai saia katar o Elimelek kai saia katar amari familia.

⁴ Mangava te phenav le chuke, soke te mangea te chine goia umal, phenle angla gala llene ta angla e phure katar o foro. Soke san mai but familia katar o Elimelek neko me, orta si te chine leki umal. A te na chindan la tu, phenle mange, soke mapalal tutar avav me te chinav e umal. Gua lleno phenda: Me ka chinav la.

⁵ Ondaka o Booz phenda leke: Morabi te llane kai te chindan e umal katar e Noemi, trubul te zini tut e Rutaia, e phivli kai si katar o Moab, ta gia e umal pale te achel po anav katar lako rrom kai mulo.

⁶ Kana asunda goia orba, gua lleno phenda: A te si gia nasti chinav e umal, soke sai muril so ka mukav me porodoke. A te mangea te chine la tu, chin la, me mukav la chuke.

⁷ Omanglal ando Israel sea sikade, kai kana vareko mukela avere te chinel so si katar e familia, o kana achena pe iek orba te chinen o te bichinen vareso, o lleno kai bichinela o kai mukela ogoleke vareso, saia te ikanel pi sinela ta te del la ogoleke. Ta sar sea sikade gia,

⁸ o lleno kai saia katar e familia e Boozoki, ikanda pi sinela, dia la kai o Booz ta phenda leke: Chin la tu.

⁹ Ondaka o Booz phenda e phurenge ta e llenenge kai sea kote: Saurre asunden allive kai chindem katar e Noemi sa so saia katar o Elimelek, katar o Kilion ta katar o Malon.

¹⁰ Ta i asunden kai e Rut ka avel mi rromi, e phivli moabita, ta gia te achel e umal po anav katar o Malon, lako rrom kai mulo. Ta gia ni ka jasaol leko anav maskar leke llene, ta ni ka avel bristardo ande gava foro. Allive tumen asunden gaia orba.

¹¹ E phure ta sa e llene kai sea kote phende: Saurre asundam. ¡Te cherel o Del goia diskinia kai ka del ande cho cher, te avel sargo e Rakel ta sargo e Lia, kai sa e llene katar o Israel sam katar lengo porodo! A tu, te ave iek lleno glamno ande Efrata, iek lleno asundo ando Belen.

¹² O Del te del tut but minone katar gaia diskinia. Te avel tut baro porodo, gia sar avila e Farese, o chavo katar e Tamar ta o Juda.

¹³ Gia si sar zinisailo o Booz ta e Rut. Zivisarda laia ta o Del mukla te achel khamni ta avila la iek minono.

¹⁴ Ta e diskinie phenena e Noemiake: ¡Blagosime te avel o Del, kai allive dia tut iek unuko te arakhel tut! ¡Te cherel o Del te avel asundo cho unuko ando Israel!

¹⁵ Vou ka del tut zor ta ka arakhel tut kana ka ave phuri, soke vou si chaurro che boriako kai volil tut but, ta kai chuke mol la mai but neko efta chaurre.

¹⁶ E Noemi thoda e minone pe po brek ta voi bariarda le.

¹⁷ Kana dikhle le e diskinie kai zivina pase, phenena: ¡E Noemi bianda! Ta thode leko anav Obed. Vou saia o dad e Jeseeko ta papo e Davideko.

E vicha e Davideki

¹⁸ Gaia si e vicha katar o Fares, O Fares saia o dad e Esroneko,

¹⁹ a o Esron saia o dad e Rameko, o Ram saia o dad e Aminadabeko,

²⁰ a o Aminadab saia o dad e Naasonoko, o Naason saia o dad e Salmonoko,

²¹ a o Salmon saia o dad e Boozoko, a o Booz saia o dad e Obedeko,

²² a o Obed saia o dad e Isaieko, ta o Isai saia o dad e Davideko.