Руфь 3 - Biblia ande chib Romani

O Booz phenel kai ka pomozil e Ruta

¹ Iek llive e Noemi phenda e Rutake gia: Chorrie, trubul te rodav chuke iekhe rrome te ave veseli.

² Asun, o Booz kai si amari familia, kai tu radisardan leke slugenchar, si te llal gaia riat kai e umal te fulavel e kuchorra katar e char suki.

³ Tu ka chere gaia ezgoda: Naiv, thov pe tute meriso, ta che mai sukar patave, ta lla incha. Ta arak te na llanel vou ko san lligo ni ka jal ta ka piel.

⁴ Prezosar ta dik kai ka thovelpe te sovel. Ondaka lla puchar leke porrne, ta perchuke pasa le, mapalal isto vou ka phenel chuke so si te chere.

⁵ E Rut phenda: Ka cherav sa so phendan mange.

⁶ E Rut lleli kai e umal, ta cherda sa so phenda lake laki sasui.

⁷ O Booz jala, pila ta dikhola but veselo. Ondaka inzilo te sovel pasa e umpa kuchorra. Mapalal avili e Rut bi te asundol, pucharda leke porrne ta inzili pasa le.

⁸ Kana saia dopas katar e riat, o Booz llungadilo oma, ta chudisailo soke iek diskinia saia inzardi pasa leke porrne.

⁹ Ondaka o Booz phenda: ¿Ko san tu? Voi phenda: Me sem e Rut chi sluga, ta trubul te arakhe man soke san mi familia. Mangav te zini tut manchar.

¹⁰ O Booz phenda: ¡O Del te blagosil tut! Akana sar nikada sikadan kai san chachi che rromeke kai mulo. Tu sai rodiana avere llene mai terno mandar, chorro o barvalo, ta ni cherdan le.

¹¹ Na dara chei chorrie, sa llanen ande mo foro kai tu san iek diskinia lachi. Goleke, me ka cherav so tu mange mandar.

¹² Chachimaia me sem chi familia, a si aver lleno kai si mai but familia neko me.

¹³ Achi kate gaia riat. Ta thiara te mangla vou te cherel so trubul te cherdol kana si katar e familia, ka cherel le, a te na cherda le, me dav tut mo alav angla o Del kai me ka cherav le. A akana sov chuke lligo ni ka llivosaol.

¹⁴ Goia riat e Rut sovti kai e porrne katar o Booz. Thiarinako rano, ustili mai anglal te pharron e zore kana saia but truniariko, soke o Booz ni kamela te llanel niko kai iek diskinia avili kai e umal.

¹⁵ Ondaka o Booz phenda lake: Ikan tutar cho gertachi ta istar le zurale. Ta kana e Rut istarela o gertachi, o Booz thoda andre sov droma sebada, mapalal pomozisarda la te thovel le pe po dumo, ta llelitar ando foro.

¹⁶ Kana e Rut avili chere, laki sasui puchla la: ¿Sar llela chuke chorrie? Ta e Rut phenda lake sar o Booz pomozisarda la,

¹⁷ ta phenda: Dia man sa gaia sebada ta phenda mange: Nasti iri tut kai chi sasui chuche vastengi.

¹⁸ Ondaka e Noemi phenda lake: Akana chorrie, adurichar te dikhe so ka avelpe. Gava lleno ni ka achel lligo ni ka lacharel gaia ezgoda isto allive.