Руфь 2 - Biblia ande chib Romani

E Rut ande Boozoki umal

¹ Saia iek lleno kai saia familia katar o Elimelek, o rrom katar e Noemi. Gua lleno ikhardola Booz, ta saia but barvalo ta e llene thovena leke but sama.

² Iek llive e Rut phenda e Noemiake: Muk te llav ande umalia te dikhav dal si fisavo lleno kai chidel espige, ta te mukel man te llav pala le, te chidav vareso i me. Laki sasui phenda lake: Lla chorrie.

³ E Rut lleli kai iek umal, ta thoda te chidel so mukena e llene kai chidena espige. Ta laki baj saia kai o gazda katar goia umal saia o Booz, kai saia familia katar o Elimelek.

⁴ Ondaka o Booz avela katar o Belen, ta phenda e llenenge kai radina ande goia umal: ¡O Del te avel tumenchar! A von phende leke: ¡O Del te blagosil tut!

⁵ Ondaka o Booz puchla e llene kai gazdarila pe leki umal: ¿Katar savi familia si goia chei?

⁶ Vou phenda leke: Voi si iek moabita kai avili katar o Moab e Noemiaia.

⁷ Ta mangla mandar te mukav la te llal pala e llene kai chiden espige te chidel i voi, ta cherda le sa e thiarin llik akana kai avili te lelpe latar o chiñipe.

⁸ Ondaka o Booz phenda e Rutake: Asun chei chorrie, na chide ios espige ande aver umal. Achi kate me slugenchar,

⁹ ta lla pala gola diskinie kai si me sluge ta dik ande savi umal radin, soke me diem orba me slugenchar te na joliaon tuia. Kana ka avel chuke trus, lla kai e piria e paieke, ta pi katar o pai kai von ande.

¹⁰ E Rut bangili llik pe phuv te del le liubao, ta puchla e Boozo: ¿Soke thodan che akha pe mande, ta soke san gia posteno manchar, kana me sem katar aver phuv?

¹¹ O Booz phenda lake: Me llanav sa so cherdan pala chi sasui sar kana mulo cho rrom, ta i llanav kai muklan che da ta che dade ta chi phuv, te ave te zivi amenchar, kai sama llene kai ni pinllarea.

¹² ¡O Del te pochinel chuke! ¡O Gazda ta Del katar o Israel kai rodian le, te arakhel tut, ta te del tut but lachipe pala sa so cherdan!

¹³ A voi phenda leke: Tu san but posteno, ta che alava den man but zor. Dian manchar orba volimaia, a me ni resav te avav ni sargo iek katar che sluge.

¹⁴ Kana avilo o vreme te jan, o Booz ikharda e Ruta ta phenda lake: Aide kate, le iek kotor marrno, ta bol le ande gaia mol sukli. Voi besli pasa e llene kai chiden espige, ta o Booz dia la te jal kuchorra peke. Voi jala ta chalili, ta i achila la ios.

¹⁵ Mapalal, kana lleli pale te chidel espige, o Booz phenda gia pe ternenge kai radina leke: Muken la te chidel maskar e umpe katar e sebada. Ta na achaven la.

¹⁶ Ta i muken te peren nesave katar tumare espige te lel len voi. ¡Ta ni kamam niko te joliaol laia!

¹⁷ E Rut chidia espige ande umal e Boozoki lligo ni peli e riat. Ta sa so chidia voi, kana drebosarda e kuchorra, saia mai but katar e bis kile sebada.

¹⁸ Ondaka inllarda ando foro e sebada, ta lleli te sikavel la pe sasuiake. Mapalal ikanda so achilala katar o jape, ta dia le kai e Noemi.

¹⁹ Ta e Noemi puchla la: ¿Kai radisardan allive? ¿Kai chidian gachin sebada? ¡O Del te blagosil gole kai pomozisarda tut! A e Rut phenda pe sasuiake: O lleno kai mukla man te radiu ande leki umal ikhardol Booz.

²⁰ A e Noemi phenda lake: ¡O Del te blagosil le! Vou avila amenchar lacho akana, gia sar saia lacho amare llenenchar kai mule. Gava lleno si amari familia, ta goleke vou si iek katar e llene kai morabi te arakhel amen.

²¹ A e Rut phenda: Ta i phenda mange te radiu leke slugenchar, lligo ni ka getolpe o vreme kai chidelpe e sebada.

²² Ondaka e Noemi phenda pe boriake: Chorrie, sukar si te ache leke slugenchar, ta te na lla kai aver umal, te na joliaol niko tuia.

²³ Ta e Rut chidia e slugenchar katar o Booz lligo ni getosailo o vreme kai chidelpe o lliu ta e sebada. Ta e Rut zivila pe sasuiaia.