Proverbios 8 - Biblia ande chib Romani

Orba e bizaimaki

¹ O llanglipe urkil bare avazea, o bizaipe mukliarel po avazi.

² Thovelpe pe porrne upral pe burdura, achel kote kai maladon dui droma,

³ asundol pasa e udara, kote kai delpe ando foro phenel gia:

⁴ Tumenge murusalen llan gala alava murne.

⁵ Ternorralen kai ni llanen ta sen dile, ¡Sikon te mislin tumen ta te aven llangle!

⁶ Thoven sama, soke ka phenav tumenge ezgode but glamne ta orta.

⁷ So ka phenav tumenge si o chachipe, inai mange drago te kojavav.

⁸ Sa me alava si chache, ta inai len nisavo kojaipe.

⁹ E lleneke kai si bizai ta llanglo, me alava si briste ta orta.

¹⁰ Mai preche si te len sikadipe ta bizaipe neko rup ta sunakai mai kuch,

¹¹ Mai mol o bizaipe neko e barrorra kuch, ¡niso inai prema le!

¹² Me, o llanglipe, sem e bizaimaia, ta si man e mai lache orbe kai sikaven.

¹³ Te blagosi e Devle gua si te murzi po bilachipe. Me murzui po baripe ta o istardipe, po bilacho drom ta po kojaipe.

¹⁴ Me phenav so ka cherdol, ta me cherav le, me sem o lacho mislo ta e zor.

¹⁵ Me cherav te charoin e charura ta me cherav te krisin e krisaria.

¹⁶ Ma cherav te gazdarin e kraliura ta chinen krisa e sudura.

¹⁷ Me voliu golen kai volin man, ta malaven man gola kai roden man.

¹⁸ Me dav barvalipe ta liubao, barvalipe kai inai le son, ta chachipe.

¹⁹ So me dav si mai lacho neko o mai lacho sunakai, so me anav tumenge si mai lacho neko o mai lacho rup.

²⁰ Me llav po drom orta, katar o drom e chachimako.

²¹ Golen kai volin man dav len so perel len: pherav lengo cher barvalipe.

²² O Del cherda man kana iakom cherela po rado mai anglal te cherel sa e ezgode.

²³ Cherda man kana iakom llala o vreme, mai anglal te cherel e phuv.

²⁴ Cherda man mai anglal te avel e mora e bari, mai anglal te avel e len ta te likel o pai katar e phuv.

²⁵ Mai anglal te chapenil e burdura, o Del cherdaia man.

²⁶ Nios ni cherdaia vou ni e phuv ni e umalia, ni o prajo kai si cherdi e phuv.

²⁷ Kana thoda o miloso upral po pai katar e mora e bari,

²⁸ kana chidia e oblakura ando miloso ta chapenisarda pai katar e mora e bari,

²⁹ kana phanda e morake te na likel katar po than, kana o Del chapenisarda e phuv,

³⁰ kote sema me sema lea, ta thovava sa pe po than. Me sema leki dragostia sa o vreme, ta chelava man angle le sa o vreme,

³¹ chelava man ando sueto cherdo, ¡ta mi dragostia sea e manusa!

³² A akana chaurralen, asunen man, cheren so cherav me ta ka aven vesele.

³³ Thoven sama po sikadipe, na den e zea po bizaipe.

³⁴ Blagosime o lleno kai asunel man, ta kai suako llive prezol pe udara katar mo cher.

³⁵ Soke ko malaven man malaven o zivoto ta o Del blagosil le,

³⁶ a ko duriol mandar thovel po zivoto pe dar, ¡ko murzil pe mande volil o meripe!