Proverbios 6 - Biblia ande chib Romani

Kana aver lleno si unllile

¹ Chaurrea, te pochindan pala cho amal o te achilan lacho pala o lleno kai ni pinllare,

² isto tu thove tut ando kojaipe: ache phanglo isto ande che alava.

³ Cher so ka phenav chuke, ta ka bradui tut katar avereke va: bristar tut katar cho liubao, ta mang che love katar cho amal.

⁴ Na sov, na muk te phanglion che akha,

⁵ nas, sar nasel iek siervo katar o manus, nas, sar nasel e chirikli kana mangen te istaren la.

So si te cheren gola kai ni radin

⁶ Lla dik so cherel e chir, tu kai ni chere niso, thov sama cho cherel ta sikiu latar:

⁷ makar inai la ko te gazdaril pe late ta ko te phenel lake so te cherel,

⁸ Voi thovel po jape pe iek than lacho o milai, guruvel le kana si o vreme te chinden.

⁹ ¡Na sov ios, tu kai ni chere niso! ¡Na inziu ios!

¹⁰ Tu sove chuke, de tut ande lindri, khuve che va te sove mai sukar,

¹¹ a o chorripe ka avel pe tute zurale, sargo iek lleno chudino kai phirel po drom, ka trubul tut sargo iek lleno kai mangel esmola.

Sar si o lleno bilacho

¹² O lleno kai si bilacho, leko mui bangol katar o kojaipe,

¹³ cherel e akhaia, terril pe porrne, del orba e naienchar,

¹⁴ leki golli si bilachi, samo mislilpe te cherel o bilachipe ta te cherel e llenen te marenpe.

¹⁵ Goleke, but oma ka perel pe lete zatrania, kana ni ka uzdilpe ka zatrilpe ta ni ka avel le drab.

Pe so murzil o Del

¹⁶ Sou ezgode si, ta i efta, kai e Devleke inai drago ta gadolpe lendar:

¹⁷ E akha barikane, e chib kojamni, e va kai mundaren e llenen kai inai dosale,

¹⁸ e golli kai mislura te cherel o bilachipe, e porrne kai sigaren te prasten kai o bilachipe,

¹⁹ o lleno kai phenel so dikhla ta kojavel, ta gua kai cherel te marenpe e phlal.

Sar pochinel o kurvaluko

²⁰ Chaurrea, guruv ande che mislura e zakonura che dadeke ta so sikade tut chi dei.

²¹ Inllar len suako llive pe cho lio, phande len pe chi kor,

²² ka sikaven chuke o drom kana ka lla varende, ka arakhen tut kana ka sove, ka den tuia orba kana ka uste.

²³ Chachimaia, e zakonura ta o sikadipe si iek lampara phabardi. O ortope ta o sikadipe si o drom e zivotoko.

²⁴ Ka arakhen tut katar e diskinia bilachi, katar e alava gugle katar avereki rromi.

²⁵ Na muk te phabarel chi lio lako sukaripe, ¡na muk te istaren tut lake akha!

²⁶ E kurvichka mol chuke so mol iek marrno, a e diskinia avereki mol la cho zivoto.

²⁷ Kogo thovel e iag pe po brek, ka phabon leke patave.

²⁸ Kogo phirel pe angara phabarde, ka phabon leke porrne.

²⁹ Kogo amilpe avereke diskiniaia, ni ka achel bi te pochinel po bilachipe.

³⁰ Niko ni joliaol po chorano kai vazdel te phagel pi bok,

³¹ a te dikhen le kai vazdel, trubul te pochinel efta droma so vazdia, ta te del sa so si le.

³² ¡Gia dilo si gua kai llal avereke diskiniaia! ¡O llene kai cherel le zatril vou pe!

³³ Ka chalaven le ta ka kusen le, ta nisoia nasti ka lel petar o lallao kai cherda,

³⁴ Soke o murus kojadino katar po rromi phabol jolinatar sargo e iag, ta ni prostil kana mangel te ikanel pi duk,

³⁵ ni ka thovel sama te pochinena leke, ni te dena le ezgode ta phagol leki joli.