Proverbios 5 - Biblia ande chib Romani

E diskinia bilachi, jasarel e muruse

¹ Thou sama pe mo llanglipe, chaurrea, asun mo bizaipe.

² Ta gia ka chere e ezgode bizaimaia ta sai ka de orbe llangle.

³ Soke e diskinia avereki del orba guglimaia ta lako avazi si kovlo sargo o zeitino,

⁴ a cherdol mai cherko neko e feria ta mai ostro neko iek jarni ostro pe dui riga.

⁵ Te lla laia lla kai o meripe, lake korakura inllaren orta kai o limori.

⁶ Lake ni chitilpe so cherel pe po zivoto ta ni thovel sama kai llal bangimaia,

⁷ Goleke chaurrea, thov mange sama, na duriu katar mo sikadipe.

⁸ Duriu katar e rromi avereki, na lla ni pasa o udar katar lako cher,

⁹ te na jasare o liubao ta cho ternipe anda va katar e llene kai ni pinllare ta kai si bilache,

¹⁰ te na pherdon e lovenchar kai lian che zoriaia ta che radoia e llene kai ni pinllare.

¹¹ Te na thodan sama, ka rove pala e dos kana chi esnaga ta cho mas ka bilaol.

¹² Ta ka phene: ¡Soke ni thodem sama kana ortona man! ¡Soke ni kandiem kana dena pe mande!

¹³ ¡Ni kamlem te asunav me kovachen ni thodem sama golenge kai sikavena man,

¹⁴ ta sai pelema ande bari belava angla sa e llene!

¹⁵ Phag chi trus e paiea kai likel katar cho bunari

¹⁶ na chude o pai kai likel katar chi phuv, na chude le ta na rispi le po drom.

¹⁷ O bunari ta o pai si chire, ta nikake ios, ¡na de le e llenenge kai ni pinllare!

¹⁸ ¡Blagosime te avel o pai kai likel katar chiri phuv! ¡Veselisao e diskiniaia katar cho ternipe,

¹⁹ sukariorri sargo iek bakriorri! ¡Te ache bi te malmil tut sa o vreme! ¡Te ave ulime suako drom ande lako volipe!

²⁰ ¿Soke te ami tut, chaurrea, avereke diskiniaia? ¿Soke de tut ande va katar e diskinia kai ni pinllare?

²¹ O Del dikhel pe so cherel o murus, ni lel pe akha katar leke korakura.

²² E bilache istarel le isto leko bilachipe, isto leko bilachipe istarel le sargo iek solo.

²³ Leko billanglipe ka mundarel le, leko baro dilipe ka inllarel le kai o jasardipe.