Proverbios 4 - Biblia ande chib Romani

Sar te lla po lacho drom

¹ Chaurralen, kanden tumare dade ande so phenel tumenge, thoven leke sama, te sai len o lacho mislo.

² Me sikadem tumen sukar, goleke, na muken mo sikadipe.

³ Soke i me sema chaurro: mo dei volila man but

⁴ ta mo dad sikavela man gia: Pisisar me alava ande cho lio, cher so phenav chuke ta ka zivi.

⁵ Le o bizaipe ta chide o lacho mislo, na bristar me alava.

⁶ Volisar o bizaipe ta na muk le vou ka arakhel tut.

⁷ O mai baro bizaipe si te blagosi e Devle, te le o bizaipe ta o lacho mislo.

⁸ Volisar le, ta ka bariarel tut, lipisar pe tute o bizaipe, ta ka del tut liubao,

⁹ ¡ka del tut iek korona but sukar ta ka thovel la pe cho soro!

¹⁰ Thou sama pe me alava, chaurrea, cher len chire ta ka zivi mai but.

¹¹ Me ka inllarav tut po drom katar o bizaipe ka cherav te lla po lacho drom,

¹² kote kai niso ni achavel tut te phire, kote kai i te prastea ni ka eskombal cho porrno.

¹³ Istardo po sikadipe ta na muk le, cher so siko, soke del tut zivoto.

¹⁴ Na lla pala e bilache llene, na cher so cheren von.

¹⁵ Na phir katar o drom kai von phirde, duriu lendar ta lla angle,

¹⁶ soke ni chinion te cheren o bilachipe, ta nasti soven kana ni peraven vareka.

¹⁷ ¡Lengo jape ta lengo pipe si o bilachipe ta o silnope!

¹⁸ O drom katar e chache si sargo o villelo katar iek nevo llive: kai suako drom dikhol mai but lligo ni kletosarel mai zurale.

¹⁹ A o drom e bilachengo si truniariko, ¡ta ni llanen pe so eskomban!

²⁰ Thou sama pe me alava, chaurrea, asun so phenav chuke.

²¹ Nikada na le lendar che akha, ¡pisisar len ande cho lio!

²² Von den zivoto ta sastipe suakone llene kai malavel len.

²³ Arak cho lio mai but neko niso pe gaia phuv, soke letar likel o zivoto.

²⁴ Na phen so inai chachipe, duriu katar o kojaipe.

²⁵ Suako drom dik angle, suako drom dik angla tute.

²⁶ Thou sama kai thove che porrne, ta suako drom ka ustave pe phuv e zurali.

²⁷ Na like katar cho drom, ¡duriu katar o bilachipe!