Proverbios 31 - Biblia ande chib Romani

Alava kai phenda o Lemuel

¹ Alava kai phenda o charo Lemuel, katar e poroka kai phenda leki dei te sikavel le.

² Chaurrea murno, kai biandem tut, chaurrea kai zeliva tut, ¿So sai sikavav tut?

³ Na de chi zor kai e diskinie, ta na lla pe ezgode kai cheren te jasaon e charura.

⁴ Ioi Lemuel, nai prema e charura te pien mol, ni te pien rachia gola kai gazdarin,

⁵ soke sai bristarenpe katar o zakono ta kai trubul te arakhen golen kai si mai chorre.

⁶ Muk e mol ta e rachia golenge kai si lenge zalba,

⁷ ¡te pien ta te bristarenpe katar po chorripe ta pi nuzda!

⁸ De orba pe kris pala sa e llene kai inai len ko te arakhel len ta pala e phivia.

⁹ De orba ta krisisar lenge chachimaia, arak golen kai si chorre ta kai trubul len.

¹⁰ E diskinia lachi ¿Ko ka malavel la? ¡mol la mai but neko e barra mai kuch!

¹¹ Lako rrom uzdilpe ande late ta nikada ni ka achel bi lovenchar.

¹² Pe rrome del bari dragostia suako llive katar po zivoto.

¹³ Rodel e bal e bakrenge ta o lino ta lenchar cherel ezgode sukar pe vastenchar.

¹⁴ Sargo iek llimia kai anel ezgode katar aver phuvia, isto gia voi anel duratar so chinda te chiravel.

¹⁵ Voi ustel mai anglal te likel o kham ta del te jal pe familia ta pe slugen.

¹⁶ Rodel iek umal ta chinel la ta pe lovenchar thovel te bariol e drak.

¹⁷ Voi si zurali ta cherel zor pe vastenchar.

¹⁸ Arakhel o rado kai cherel ta sorro riat pale radil.

¹⁹ Isto pe vastenchar cherel thava ta khuvel len.

²⁰ Suako drom pomozil golen kai si chorre ta golen kai trubul len.

²¹ Ni daral pe familiake kana perel o iv soke pe lende si patave thule.

²² Isto voi cherel pe chitura, ta lake patave si cherde katar o lino mai kuch.

²³ Lake rrome pinllaren le pe udara e foroke, kana besel e phurenchar katar o foro.

²⁴ Voi cherel chitura ta kavisa ta bichinel golenge kai radin ande patave.

²⁵ Voi si zurali ta inai barikani, ta ni breigilpe katar so ka avelpe thiara.

²⁶ Del orba bizaimaia, ta ande lako mui si o sikadipe katar e zalba.

²⁷ Suako drom dikhel sar llal lako cher, ta jal o marrno kai voi radisarda te lel le.

²⁸ Lake chaurre usten ta blagosin la, ta i lako rrom blagosil la ta phenel:

²⁹ Si but diskinie lache, a tu san e mai lachi katar sa e diskinie.

³⁰ O sukaripe si kojamno ta sargo iek suno so si sukar, a e diskinia kai del liubao e Devle si te avel blagosime.

³¹ ¡Den la katar e ezgode kai cherda! ¡te blagosin la pe udara e foroke e ezgode kai cherda!