Proverbios 30 - Biblia ande chib Romani

¹ Alava katar o Agur, chavo katar o Jake katar o Masa. O Agur anda eik poroka kai o Ukal ta kai o Itiel ta phenda:

² Me sem o mai silno katar sa, ta ni llanav te misliu man sargo e manusa.

³ Me ni sikilem o bizaipe, ta ni pinllarav o bizaipe katar o Santo Del.

⁴ ¿Ko llelo upre ando miloso, ta fulisto? ¿Ko phangla e baliava ande po va? ¿Ko phangla e paia ande iek chiti? ¿Ko chapenisarda sa e riga katar e phuv? ¿Llane sar ikhardol vou, ta sar ikhardol leko chavo?

⁵ Suako alav e Devleko si chisto, vou si o eskudo katar gola kai uzdinpe ande lete.

⁶ Na thov ios alava ande leke alava, soke sai del pe tute ta sai ache sargo iek kojamno.

⁷ Samo dui ezgode mangav tutar Devla, delen mange mai anglal te merav:

⁸ Duriar mandar so inai chacho ta o kojaipe, na cher man ni chorro ni barvalo, de man samo o marrno kai trubul man.

⁹ Soke sai avel man but ta sai phenav kai ni pinllarav tut. A te chorraiuvav sai cherdivao chorano, ta golea ka kusav o anav katar mo Del.

¹⁰ Na dosar e sluga angla leko gazda, soke sai proketil tut ta ka inllare tuia guia duk.

¹¹ Si llene kai proketin pe dade ta ni blagosin pe da.

¹² Si llene kai von peke si chiste, a ni chistosaile katar po bilachipe.

¹³ Si llene kai mislin kai si but glamne ta dikhen pe aver barikamaia.

¹⁴ Si llene kai lenge danda si sargo jarni, ta lenge tharia sargo churia te sai zatrin sa e llenen kai si chorre pe phuv.

¹⁵ E rima kai jal o rat si la dui chorra kai samo mangen te jan. Katar trin ezgode ni chalion ta i katar iek ios:

¹⁶ O limori, e diskinia kai nasti aven la minone, e phuv suki, ta e iag kai mangel ios kasta.

¹⁷ Ko dikhel pe po dad jolinaia ta marel espurnia katar so sikavel le leki dei, e chiriklia katar e jar ka ikanen leke akha ta e minone katar e agila ka jan le.

¹⁸ Si trin ezgode kai ni llanav ta i iek ios kai si mange chudo:

¹⁹ O drom kai mukel e agila ando miloso, o drom kai mukel o sap pe barra, o drom kai mukel e llimia ande mora, ta o drom kai mukel o muruseko pe diskinia.

²⁰ E diskinia kai llal averea cherel gia: Jal, kosel po mui ta phenel: Ni cherdem nisavo bilachipe.

²¹ Trin ezgode cheren burkania pe phuv ta si iek ios kai nasti terpil iek foro:

²² o sluga kai cherdol charo, o dilo kai si le but jape,

²³ e diskinia kai niko ni mangel la ta zinilpe, ta e sluga kai achel po than katar e rromi e chereki.

²⁴ Star zivirinie si katar e mai minone pe phuv, ta si e mai bizai neko e llene mai bizai:

²⁵ e chira sargo boñikura kai inai len zor ta chinden po jape kana si o milai,

²⁶ e sosoia ni radin but ta zivin maskar e barra,

²⁷ e langoste, kai inai len charo a phiren sargo boñikura,

²⁸ e sapurke kai sai istare len ande iek va ta resen llik kai e charoko cher.

²⁹ Si trin tromane ta i iek ios kai phiren but sukar,

³⁰ o liono kai si zuralo maskar e zivirinie kai niso ni cherel le te irilpe palpale nikada,

³¹ O basno kai si barikano, o busno ta o charo kai llal angla pe boñikura.

³² Ande cho dilipe te manglan te chere baripe, ta te mislisailan te chere o bilachipe, phande cho mui che vastea ta mislisao:

³³ te amisardan o thud, ka cherdol kaimako, te phurdian zurale po cho nak ka likel o rat, a te joliardan vareka ka marelpe tuia.