Proverbios 3 - Biblia ande chib Romani

Sar te le o bizaipe

¹ Na bristar mo sikadipe, chaurrea, guruv ande che mislura me zakonura,

² ta ka zivi but burs ande veselia.

³ Na muk nikada o volipe ta o chachipe, inllar len tuia sargo iek sinlliri pe chi korr. Pisisar len ande cho lio,

⁴ ta ka pomozil tut ta ka volil tut o Del ta i e manusa.

⁵ Uzdisao sa che liea ando Del ta na ande cho bizaipe.

⁶ Te avel o Del ande suako ezgoda kai chere, ta vou ka inllarel tut po drom o orta.

⁷ Na istardo but bizai, blagosisar e Devle ta duriu katar o bilachipe:

⁸ ¡gua si o mai lacho drab te avel zurali chi esnaga!

⁹ Blagosisar e Devle che barvalimaia ta e purve septelienchar kai chide,

¹⁰ ta gia cho cher ni ka del ios katar o jape ta o pipe.

¹¹ Thou sama chaurrea, kana o Del sikavel, ta na joliao kana del pe tute,

¹² soke o Del ortol gole kai volil, sargo iek dad kai ortol pe chaurre kai mai volil.

¹³ Blagosime ko malavel o bizaipe, gua lleno kai lel o llanglipe,

¹⁴ soke mai mol len neko o rup ta den mai but chari neko o sunakai.

¹⁵ O bizaipe mol le mai but neko e barra mai kuch, ¡ni sa so mai zelil o manus, inai prema o bizaipe!

¹⁶ Katar o va o chacho del tut zivoto, a katar o stingo, barvalipe ta liubao.

¹⁷ Te lla pala lete si but sukar, te phire pe leke droma, ka zivi ande pas.

¹⁸ O bizaipe si zivoto goleke kai lel le, ¡blagosime gola kai ni muken le!

¹⁹ Bizaimaia ta llanglimaia, o Del ziriarda o miloso ta e phuv,

²⁰ bizaimaia cherda te putaol e mora ta katar e oblakura cherda te pechalpeke.

²¹ Suako drom cher e ezgode bizaimaia, chaurrea, ta ande iek lacho mislo,

²² soke lendar ka le o zivoto ta ka aven chuke sargo iek sinlliri pe chi korr.

²³ Ka uzdi tut kana ka phire po drom ta nikada ni ka eskombal cho porrno.

²⁴ Kana ka ache te lelpe tutar o chiñipe ni ka dara, kana ka pere chuke, ka sove esmiro.

²⁵ Ni ka dara katar so daravel oma ni katar e zatrania kai ka perel pe bilache llene,

²⁶ soke ka uzdi tut ando Del ta ni ka mukel te pere ando kojaipe.

²⁷ Na phen kai iok kana sai chere iek sebapi kote kai trubul,

²⁸ na pomozisar thiara te sai chereale allive.

²⁹ Na mislisao te chere o bilachipe goleke kai uzdilpe ande tute.

³⁰ Na rode te mare tut nikaia, kana niko ni dukhada tut.

³¹ Na zelisar so si le o lleno bilacho ta na rode te chere so cherel vou,

³² soke o Del gadolpe katar e bilache, a e chache si pasa le ta volil len.

³³ O Del proketil o cher katar o bilacho, a blagosil o than kai zivil o chacho.

³⁴ O Del marel espurnia katar gola kai maren espurnia, a si posteno golenchar kai ni istardon.

³⁵ E llene bizai len o liubao, a e dile si asunde soke inai len liubao.