Proverbios 29 - Biblia ande chib Romani

¹ O lleno kai den pe lete ta ni kamel te acharel, oma ka avel zatrime ta ni ka avel le drab.

² Kana dobin e chache o sueto veselilpe, a kana e llene bilache gazdarin, o sueto dukhadol.

³ O chaurro bizai veselil pe dade, a gua kai llal e kurvichkenchar chudel e love.

⁴ O charo pe krisaia chapenil e foro, a gua kai samo mangel te pochinen leke zatril le.

⁵ Ko blagosil but pe amale gua si soke thovel iek kojaipe pe leko drom.

⁶ O lleno bilacho ka perel isto ande pokojaipe, a o chacho ka llilabel ta ka veselilpe.

⁷ O chacho llanel so mangen e chorre, a o bilacho ni acharel niso.

⁸ E llene balave cheren burkania ando foro, a e llene bizai achaven e joli.

⁹ O lleno bizai te jalape iekhe dilea joliaola o asala ni ka lacharel niso.

¹⁰ E llene kai mundaren inai lenge drago e llene orta a e llene chache roden lange o lachepe.

¹¹ O dilo cherel sa e joli kai si ande leko lio, a o bizai achavel pi joli.

¹² Kana iek charo thovel sama po kojaipe sa gola kai radin leke ka cherdon bilache.

¹³ O chorro ta gua kai lel chari pe lete, e duien o Del cherel len te zivin.

¹⁴ O charo kai gazdaril pe chorre chachimaia, leko trono si zuralo ostade.

¹⁵ Iekhe kastea ta e orbaia sikadol o bizaipe, a o chaurro kai cheren sa pe leko si o lallao pe dako.

¹⁶ Kana si but llene bilache, si but bilachipe, a e llene chache ka dikhen lengi zatrania.

¹⁷ De pe cho chaurro ta ni ka del tut ni iek briga ta ka cherel te ave but veselo.

¹⁸ Kana inai e poroka e Devleki o foro ni llanel so ka cherel, ¡blagosime e llene kai cheren so phenel o zakono e Devleko!

¹⁹ O sluga ni ortolpe e alavenchar, soke acharel ta ni kandel.

²⁰ Mai but sai adurichare katar iek lleno dilo neko katar iek balavo kai ni mislilpe so phenel.

²¹ Gua kai arakhel but pe sluga sar kana saia minono, mapalal ka achen e slugake sa leke ezgode.

²² O lleno silno vazdel e chingar, cherel te marenpe ta kojadol ande but ezgode.

²³ O lleno barikano ka avel thodo ando lallao, a o lleno kai lallal ka den le liubao.

²⁴ Gua kai si zanio katar o chorano murzil pe po zivoto, soke asunel kai si proketo ta ni phenen niso.

²⁵ E dar e manuseki kojavel, a o lleno kai uzdilpe ando Del ka avel blagosime.

²⁶ But llene roden te volil len o charo, a o Del si kai chinel e kris suakoneke.

²⁷ E llene chache nasti terpin e bilachen, ta e bilache nasti terpin e llenen kai llan orta.