Proverbios 28 - Biblia ande chib Romani

¹ O lleno bilacho nasel a niko ni llal pala le, a e chache zivin esmiro sargo iek liono.

² Kana o foro ni kandel but llene gazdarin, a pala iek lleno bizai o foro llal sukar.

³ O lleno bilacho kai dukhavel e chorren si sargo o baro bursin kai muril so o lliu.

⁴ Gola kai muken o zakono blagosin e bilachen, a gola kai kanden o zakono janpe lenchar.

⁵ E bilache ni llanen so chi o chachipe, a gola kai roden e Devle acharen suako ezgoda.

⁶ Mai preche si te ave chorro ta chacho neko barvalo ta te lla bangimaia.

⁷ Ko kandel o zakono si iek chaurro bizai, a ko llal golenchar kai jan but mukel ando lallao pe dade.

⁸ Ko chidel love po unllilipe ta lel mai but neko so saia te lel, leke love ka achen goleke kai si leke zalba katar e chorre.

⁹ Ko ni kamel te asunel o zakono e Devleko, o Del ni ka asunel leko molipe.

¹⁰ Ko jasarel e lachen po bilacho drom, ka perel isto ande po kojaipe, a e llene kai si chache ka len o mai lachipe.

¹¹ O barvalo mislil kai si o mai bizai, a o chorro kai si bizai llanel sar si andral.

¹² Kana dobin e chache si bari veselia, a kana dobin e bilache sa e llene gurudon.

¹³ Ko ni guruvel po bilachipe ni ka llal leke sukar, a ko phenel po bilachipe ta mukel le ka avel prostime.

¹⁴ Blagosime o lleno kai del liubao e Devle, a gua kai zuriavel po lio ka zatrilpe.

¹⁵ O lleno bilacho kai gazdaril pe iek foro chorro si sargo iek liono kai basel o iek melledo bokhalo.

¹⁶ O kralio dilo ios mai dukhavel e foro a gua kai ni cherel but pe love ka zivil mai but.

¹⁷ O lleno kai mundarda vareka ka nasel lligo ni ka perel ando limori, ¡Te na pomozil le niko!

¹⁸ Ko llal orta ka avel braduime, a o bilacho ka perel ande belava.

¹⁹ O lleno kai radil pi umal vise guruvel o jape, ko jasarel o vreme e llenenchar pherdol chorripe.

²⁰ O lleno chacho ka avel but blagosime a gua kai sigarel te barvaol ni ka achel bi dosako.

²¹ Inai sukar te muke pe iek rig nika, llik pe iek kotor marrno sai chere o bilachipe.

²² O jamllalo sigarel te barvaol, a ni llanel kai ka avel pe lete o chorripe.

²³ Ko del pe llene te sikon mapalal mai volin le neko gole kai samo blagosil.

²⁴ O lleno kai chorel pe dade ta pe da ta phenel kai gua inai bilachipe si amal katar e kochkaria.

²⁵ O lleno kai zelil but ezgode, cherel e chingar, o lleno kai uzdilpe ando Del ka avel blagosime.

²⁶ Ko uzdilpe samo ande so mislil si dilo, a ko llal bizaimaia ka avel braduime.

²⁷ Ko del e chorre si inai chorro, a ko ni thovel leke sama ka avel proketo.

²⁸ Kana e bilache vazdiniaon e llene gurudon, a kana e bilache llene meren, e llene chache dikhon pe suako rig.