Proverbios 27 - Biblia ande chib Romani

¹ Na cher baripe ande so ka avelpe thiara soke ni llane so anel suako llive.

² Inai sukar te fali tu tut muk te falin tut aver llene.

³ E barra ta e chisai si phare, a mai phari si e dileki joli.

⁴ E joli si bilachi ta zatril, a e murzania ko sai achavel la.

⁵ Mai lache si te sikave varaka chachimaia neko te guruve cho volipe.

⁶ Mai lache si te dukhavel tut cho amal neko te chumidel tut cho dusmano.

⁷ O lleno chalio ni kamel te jal o aullin, a o bokhalo i o cherkipe si leke guglo.

⁸ Sargo iek chirikli kai furial dur katar po kuibo, isto gia si o lleno kai si dur katar pi phuv.

⁹ O zeitino ta o meriso veselin o lio a e sukar orba katar iek amal gugliarel o zivoto.

¹⁰ Nikada na de e zea kai che amal ni golen kai si amal katar cho dad. Na inllar chi nuzda kai che phlaleko cher. Mai lache si iek amal pasa neko o phlal dur.

¹¹ Trubul te ave bizai chaurrea ta ka veseli man, gia sai ka de pe llene kai kusen man,

¹² O bizai dikhel e dar ta ni nakhel kotar, a o dilo dikhel e dar ta nakhel e duk.

¹³ Ko achel lacho po unllilipe avereko le letar leke patave ta achav len tute pala o dugo.

¹⁴ Ko phenel sar san urkindo pe amaleke kana pharron e zore, gua si sargo te kusel le.

¹⁵ E diskinia kai si balavi, si sargo kana delpeke ta thavdel ta ni achel.

¹⁶ Te achave la si sargo te achave e balav o te istare o zeitino ande cho va.

¹⁷ O sastri ortolpe avere sastrea a e manuse ortol le leko amal.

¹⁸ Ko arakhel o kas e simochinengo jal katar e simochine, a ko arakhel pe gazda ka avel blagosime.

¹⁹ Gia sar dikhe tu tut pe iek geldala gia dikhe e llenen ande cho mislo.

²⁰ O meripe ta o limori nikada ni chalion isto gia o manus ni chaliol katar so dikhel.

²¹ Ande iag zumadol o rup ta o sunakai, a o manus zumadol kana blagosin le.

²² I te drobo le pe milia kotora o dilo ni mukel po dilipe.

²³ Trubul te llane sar si suako iek katar che bakre, brigisao pala che stoke,

²⁴ soke ni o barvalipe ni e korona ni achen ostade.

²⁵ Kana ka bariol e char, ta ka dikhol o zelenipe. Ta kana ka chiden e char suki po burdo,

²⁶ katar che bakrenge bal ka chere patave, che busnorre ka den tut love te chine umalia,

²⁷ ta che busnia ka den thud te pravare tut che familia ta golen kai radin chuke.